Qazaqstan Latvııamen kólik salasynda yntymaqtaspaq
ASTANA. QazAqparat - Latvııa astanasy Rıga qalasynda Qazaqstan-Latvııa kólik jónindegi jumys tobynyń birinshi otyrysy ótti, dep habarlaıdy QazAqparat QR Investıtsııalar jáne damý mınıstrliginiń baspasóz qyzmetine silteme jasap.
Otyrys Qazaqstan Respýblıkasy Investıtsııalar jáne damý birinshi vıtse-mınıstri Roman Sklıardyń jáne Latvııa Respýblıkasy Qatynas mınıstrliginiń Memlekettik hatshysy Kaspars Ozolınshtiń teń tóraǵalyq etýimen ótti.
Taraptar Qazaqstan men Latvııa arasynda áýe qatynasy, temirjol konteınerlik tasymaldar, halyqaralyq avtotasymaldar jáne kólik logıstıkasy máseleleri boıynsha ózara qarym-qatynas ornatýdyń qazirgi jaı-kúıi men pesrpektıvalaryn talqylady.
Otyrysta Qytaı - Eýropa baǵytyndaǵy konteınerlik tasymaldyń búginde mańyzy arta túskeni aıtyldy. Bul baǵytta Latvııa Qazaqstandy strategııalyq áriptes retinde qarastyratynyn aıtyp, aldaǵy ýaqytta «Baltıka-Tranzıt» konteınerlik poıyzymen tasymaldardy jandandyrý boıynsha atqarylyp jatqan jumysy týraly habardar etti. Sondaı-aq, qazaqstandyq tarap eki eldiń tranzıttik múmkindikterin paıdalaný maqsatynda yntymaqtasýǵa múddeli ekendigin rastady.
Sonymen birge, qazaqstandyq tarap «Qorǵas - Shyǵys qaqpasy» arnaıy ekonomıkalyq aımaǵynda logıstıkalyq habty damytýǵa latvııalyq kompanııalardy atsalysýǵa shaqyrdy. Taraptar bul másele boıynsha ózara qyzyǵýshylyqty eskere otyryp kelissózderdi jalǵastyrýǵa ýaǵdalasty.
Sondaı-aq, latvııalyq tarap kólik salasynda tsıfrlyq jáne «jasyl» tehnologııalardy qoldanýdaǵy tájirıbesimen bólisti. Taraptar osy baǵytta júrip jatqan jumystar jóninde aqparat almasýdy jalǵastyrady.
Jalpy, Qazaqstan men Latvııanyń kólik salasyndaǵy qarym-qatynasyn qarqyn alyp keledi. 2017 jyly eki el arasyndaǵy eksport-ımporttyq júk tasymaldarynyń kólemi 218,57 myń tonnany qurap, 2016 jylmen salystyrǵanda (212,46 myń tonna) 6,11 myń tonnaǵa ulǵaıdy.
Talqylaýlar men qol jetkizilgen kelisimderdiń qorytyndysy boıynsha taraptar hattamaǵa qol qoıdy.
