Qazaqstan Laos ónimderin Ortalyq Azııa naryǵyna shyǵarýǵa daıyn
ASTANA. KAZINFORM - Qazaqstan Respýblıkasynyń Premer-mınıstri Oljas Bektenov pen Qazaqstanǵa alǵashqy resmı saparymen kelgen Laos Halyq Demokratııalyq Respýblıkasynyń Prezıdenti Thonglýn Sısýlıt Qazaqstan Prezıdenti Qasym-Jomart Toqaev pen Laos Prezıdenti Thonglýn Sısýlıt arasynda qol jetkizilgen ýaǵdalastyqtardy júzege asyrý máselelerin talqylady, dep habarlaıdy Úkimettiń baspasóz qyzmeti.
Kelissózder barysynda ekonomıkanyń túrli salalaryndaǵy qazaq-laos yntymaqtastyǵyn keńeıtý áleýeti atap ótildi. Qazaqstan Laos ónimderin Ortalyq Azııa men Eýrazııa óńiriniń naryqtaryna ilgeriletý úshin saýda-logıstıkalyq kópir bolýǵa daıyn.
Sondaı-aq kezdesýde aýyl sharýashylyǵy salasyndaǵy ózara is-qımyldy arttyrý perspektıvalary qaraldy. Qazaqstan egistik jerler men jaıylymdar kólemi boıynsha álemde altynshy orynda jáne álemdegi eń iri bıdaı men un eksporttaýshylardyń qataryna kiredi. Laos tarapy qazaqstandyq dándi jáne maıly daqyldardy, jemshóp pen et ónimderin, al qazaqstandyq tarap Laostan kofe, kaýchýk jáne taǵy da basqa ımport taýarlaryn jetkizýge qyzyǵýshylyq tanytty. Ózara is-qımyl úshin múmkindikter agrarlyq kooperatsııada, aýyl sharýashylyǵy ónimderin birlesip óńdeý men saqtaýda, sýarýdyń zamanaýı tehnologııalaryn engizýde de ashylýda.
Tsıfrlandyrý salasynda yntymaqtastyq ornatýdyń áleýeti joǵary. Qazaqstanǵa Thonglýn Sısýlıttiń sapary aıasynda qol qoıylǵan aqparattyq-kommýnıkatsııalyq tehnologııalar (AKT) jáne elektrondyq memlekettik qyzmetter salasyndaǵy yntymaqtastyq týraly memorandým seriktestiktiń jańa múmkindikterine jol ashatyny atap ótildi. Qujat osy saladaǵy ózara tıimdi yntymaqtastyqty odan ári júıeli túrde keńeıtýge jáne tereńdetýge yqpal etetin bolady.
Mádenı-gýmanıtarlyq sala jáne týrızm salasy da perspektıvaly baǵyttar bolyp sanalady.
Laos Halyq Demokratııalyq Respýblıkasynyń Prezıdenti Thonglýn Sısýlıt Qazaqstanmen dostyq qatynastardy odan ári damytýdyń jáne birlesken jobalardy júzege asyrýdyń mańyzdylyǵyn atap ótti.
Sonymen qatar óńirlik ózara is-qımyldy damytýdyń mańyzdylyǵy atap ótildi. Qazaqstan Laosty tek ekijaqty seriktes retinde ǵana emes, sonymen qatar Ońtústik – Shyǵys Azııa elderimen ekonomıkalyq jáne iskerlik baılanystardy keńeıtýdegi mańyzdy qatysýshy retinde qarastyrady.
Kezdesý qorytyndysy boıynsha Qazaqstan men Laostyń turaqty jáne senimdi qarym-qatynastardy odan ári nyǵaıtýǵa, sondaı-aq perspektıvalyq baǵyttar boıynsha praktıkalyq yntymaqtastyqty keńeıtýge ózara múddeliligi rastaldy.
Osyǵan deıin Memleket basshysy Qasym-Jomart Toqaev Laos Prezıdenti Thonglýn Sısýlıtpen keńeıtilgen quramdaǵy kelissóz barysynda Qazaqstan Laosty Ońtústik-Shyǵys Azııadaǵy mańyzdy seriktes retinde qarastyratynyn aıtty.
