Qazaqstan Qytaımen munaı kelisimsharttaryn uzartý máselesin qaraıdy
ASTANA. QazAqparat - Qazaqstan Qytaımen munaı kelisimsharttaryn uzartý máselesin qaraıdy. Bul týraly búgin Aqordada elimizge resmı saparmen kelgen QHR Tóraǵasy Sı Tszınpınmen shaǵyn quramda kelissóz ótkizý barysynda QR Prezıdenti Nursultan Nazarbaev aıtty, dep habarlaıdy QazAqparat.
«Qazaqstanda óndiriletin munaıdyń 25 paıyzy qytaı kompanııalarynyń úlesine tıesili. Qazirgi ýaqytta olar kelisimshartty uzartý máselelerin kóterip otyr. Biz tyńǵylyqty qarastyratyn bolamyz. Óıtkeni olar bizdiń jaqsy seriktesimiz, birlesip jumys isteımiz. Sizdermen birlesip jumys istegen osy jyldarda Qazaqstan arqyly 100 mln tonnadan astam munaı, 180 mlrd tekshe metrden astam gaz jetkizildi. Qytaılyq shekarashylar málimetterine sáıkes taýar aınalymy 46, al bizdiń málimetter boıynsha 30 paıyz ósken. Mundaı aıyrmashylyq nelikten oryn alǵandyǵyn bilmeımin», - dedi QR Prezıdenti.
Nursultan Nazarbaev Qytaıdan 51 kásiporyndy Qazaqstanǵa kóshirý týraly ýaǵdalastyq bar ekendigin, búgingi kúni onyń úsheýi jumys istep turǵanyn, altaýy boıynsha jumystar júrgizilip jatqanyn aıtty.
«Sizdiń Uly Jibek jolyn damytýǵa baǵyttalǵan «Bir jol, bir beldeý» ıdeıańyzdy aıryqsha atap ótkim keledi. Siz ony alǵash ret bizde jarııa ettińiz jáne biz Uly Jibek joly men «Nurly joldy» belsendi qoldadyq. Osy ýaqyttyń ishinde Qazaqstan Qytaıdyń shekarasynan Kaspıı teńizine deıin temir jol tósep shyǵyp, Qorǵas pen Almatyny jalǵastyrdy. Osylaısha, Qazaqstan men búkil Ortalyq Azııany Qytaımen baılanystyrý máselesi túbegeıli sheshildi», - dedi Nursultan Nazarbaev
Aıta keterligi, QHR Tóraǵasy Qazaqstanǵa osymen úshinshi ret resmı saparmen kelip otyr. Sapar aıasynda ol erteń ShYU sammıtine, sonymen qatar EKSPO-2017 halyqaralyq mamandandyrylǵan kórmesiniń resmı ashylý saltanatyna qatysatyn bolady.
