Qazaqstan Qytaıǵa jylyna 400 mln jumyrtqa eksporttaı alady - Bojko
ASTANA. QazAqparat - Qazaqstandyq jumyrtqa óndirýshiler óz ónimderin Qytaıǵa eksporttaýdy josparlap otyr, dep habarlaıdy «QazAqparat» HAA tilshisi.
«Bizge Qytaıdyń naryǵyna ený kerek. Sebebi, 5 jyl buryn qazaqstandyq qus sharýashylyǵymen aınalysýshylar jergilikti naryqty qamtamasyz etýdi kózdese, qazirgi tańda naryqty tolyq qanaǵattandyryp, tipti eksportqa shyǵarýǵa múmkindik alyp otyrmyz. Janymyzda Qytaıdyń alyp naryǵy tur. Qazirdiń ózinde Tájikstan, Qyrǵyzstan, Aýǵanstan elderine jumyrtqa eksporttalýda. Tek Aýǵanstanǵa ǵana ótken jyly 13 mıllıon dollardyń 250 mln jumyrtqasy jóneltildi. Bizdiń jumyrtqa básekege qabiletti», - deıdi Qazaqstan jumyrtqa óndirýshiler qaýymdastyǵynyń prezıdenti Maksım Bojko Tselınograd aýdanynyń ortalyǵy Aqmol aýylynda BAQ ókilderine bergen suhbatynda.
Onyń aıtýynsha, qazirgi tańda jumyrtqany eksportqa shyǵarý baǵytynda Iran tarapymen kelissózder júrgizilýde.
«Eksport boıynsha sandar jyl saıyn úsh esege ósip keledi. Eger 2015 jyly eksportqa 20 mln jumyrtqa shyǵarylsa, 2016 jyly 120 mln, 2017 jyly 280 mln jóneltilgen. Biz óndiristik qýattylyqty odan ary ósire alamyz. Biraq, ónimimizdi satyp alatyn naryq kerek. Veterınarlyq máselelerge baılanysty Qytaı qazir Qazaqstandaǵy óndiriletin jumyrtqany almaıdy. Ótken jyly qytaılyq veterınarlar qus fabrıkalarynan basqa bizdiń kásiporyndardy aralaǵan. AShM-nen ótinim bolmaǵannan keıin jumyrtqa óndiretin fabrıka men qus fabrıkalaryna olar barmady», - deıdi ol.
Bojko Aýyl sharýashylyǵy mınıstrligi tarapynan jumyrtqa óndirýshiler kómek kútetinin aıtty.
«Bizge áleýetti satyp alýshylar kelgenimen, tyıymdy bilgennen keıin burylyp kete barady. Qytaı naryǵynyń bir paıyzyna ǵana 4 mlrd jumyrtqa kerek. Qazir biz jylyna 4 mıllıard jumyrtqany óndirip jatqanymyzben, birden onyń bárin sondaǵy naryqqa engizýdi kózdep otyrǵan joqpyz. Biz tek artylǵanyn shyǵarǵymyz keledi. Qazir artyq qalatyn jumyrtqanyń sany 300-400 mıllıonǵa jetip otyr. Demek, bul Qytaı naryǵynyń 0,1 paıyzy. Bizge ásirese, Shyńjań-Uıǵyr avtonomııaly ólkesiniń naryǵy qyzyqty», - deıdi Maksım Bojko.
Aıta ketsek, búgin QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev Tselınograd aýdanyndaǵy «Rodına AF» JShS-da boldy. Sonymen birge, mınıstr Tselınograd aýdanynyń ákimdiginde aýyl sharýashylyǵy kásiporyndarynyń basshylarymen salanyń ózekti máselelerin talqylady.
