Qazaqstan Qytaıǵa túıeniń qurǵaq sútin eksporttaı bastady
«Kólemi 3,5 tonnadan asatyn Saubota qurǵaq túıe sútiniń birinshi partııasyn Gansý provıntsııasynyń Lanchjoý qalasyna jóneltildi. Osylaısha qazaqstandyq taýardyń QHR-ǵa eksporttalýynyń resmı bastamasy júzege asyryldy. Osy sátti biz 5 jyl kúttik. Qytaı naryǵyna kirý óte qıyn bolǵandyqtan, úlken jumys júrgizildi», - dedi «Evrazııa Invest LTD» JShS bas dırektory Qadyrbek Meırambekov.
Birinshi qadam 2019 jyldyń qyrkúıeginde jasaldy. Memleket basshysy Qasym-Jomart Toqaevtyń sapary barysynda Qazaqstannan Qytaıǵa sút ónimderin eksporttaý jónindegi hattamaǵa qol qoıyldy.
2020 jyldyń qańtar aıynda úsh qazaqstandyq kásiporyn QHR Bas keden basqarmasynyń ımporttaýshylar tizimine endi. Olardyń qatarynda Saumal brendi bar «Evrazııa Invest LTD» JShS boldy.
Qaraǵandy oblysynda bıe sútinen untaq óndiretin zaýyt 2014 jyldan beri jumys isteıdi. Ótken jyly kásiporyn túıeniń qurǵaq sútin shyǵarýdy ıgerdi.
«Ótken jyly biz «Qorǵas» ShYHO-ǵa 609 mln teńgege óz ónimderimizdi sattyq. Satylym bıylǵy jyly da artady dep úmittendik. Biraq qańtar aıynda shekara jabyldy, qazirgi kúnge deıin Qorǵastyń saýda alańy jabyq boldy. Sondyqtan, óndiristi sertıfıkattap, ruqsat rásimdep, qazir Qytaıǵa birinshi partııany jiberemiz», - dedi Qadyrbek Meırambekov.
Bas dırektordyń aıtýynsha, zaýyt aıyna 2 tonna qurǵaq sút óndiredi.
Qazaqstan Respýblıkasy Aýyl sharýashylyq mınıstrligi men QR Aýyl sharýashylyq ónimderin eksporttaýshylar qaýymdastyǵy kompanııanyń Qytaı naryǵyna ilgerileýine kómektesken.
Qaýymdastyq tóraǵasy Baýyrjan Bakshılovtyń aıtýynsha, qazaqstandyq saýda úıi Iý qalasynda jumys isteıdi, jaqyn arada Sıanda osyndaı alań ashý josparlanýda.
Qurǵaq túıe sútin Qytaı eline eksporttaý turaqty bolady dep kútilýde.