Qazaqstan Qytaıǵa otandyq agroónim eksportyn arttyrady

NUR-SULTAN. QazAqparat – Qazaqstan Qytaıǵa aýylsharýashylyq ónimderiniń eksportyn ulǵaıtady, dep habarlaıdy QazAqparat QR Aýyl sharýashylyǵy mınıstrligine silteme jasap.

Málim etilgendeı, Qytaı úkimeti Shyǵys Qazaqstan oblysynyń sapa ınspektsııasynyń zerthanasyna quny 11,15 mln ıýan (shamamen 760 mln teńge) bolatyn jabdyqty tapsyrady. Bul QR Aýyl sharýashylyǵy mınıstrligi men QHR Kommertsııa mınıstrligi arasynda qol jetkizilgen ýaǵdalastyqtyń arqasynda múmkin boldy. Tıisti kelisimge QHR Tóraǵasy Sı Tszınpınniń Qazaqstanǵa memlekettik sapary aıasynda QR Aýyl sharýashylyǵy mınıstri Erbol Qarashókeev pen QHR-dyń Qazaqstandaǵy Tótenshe jáne Ókiletti Elshisi Chjan Sıao qol qoıǵan.

«QHR standarttary boıynsha akkredıttelgen zerthana qurý Qytaıǵa otandyq aýyl sharýashylyǵy ónimderiniń eksportyn ulǵaıtýǵa yqpal etedi. Budan basqa, Qazaqstan tereń qaıta óńdeý taýarlaryn, jemshóp pen qospalaryn, et jáne et ónimderin, sút jáne sút ónimderin jetkizýdi ulǵaıtýǵa múddeli», - delingen AShM habarlamasynda.

2022 jyldyń jeti aıynda AÓK salasyndaǵy Qazaqstan-Qytaı taýar aınalymy 46,7% artyp, 412,5 mln dollardy quraǵan.

Otandyq aýyl sharýashylyǵy ónimderiniń eksporty 62,2% - 280,4 mln dollarǵa deıin artty. Qytaıdan ımport 22,2% ulǵaıyp, 132,1 mln dollardy qurady.