Qazaqstan Qytaıǵa gaz eksporttaýdy bastaıdy

ASTANA. QazAqparat - Qazaqstan men Qytaı arasynda bir jyl ishinde 5 mlrd tekshe metr qazaqstandyq gaz jetkizý týraly tarıhı kelisimshartqa qol qoıyldy. «QazTransGaz» AQ - ulttyq operatorynyń kútiletin eksporttyq túsimi shamamen 1 mlrd AQSh dollaryn quramaq, dep habarlaıdy kompanııanyń baspasóz qyzmeti.

«QazTransGaz» AQ jáne «PetroChina International Company Limited» kompanııasy arasynda satyp alý-satý sharty jasaldy». Gazdy eksportaý jumystary 15 qazannan bastalady dep josparlanyp otyr. Gaz óndirisiniń resýrstyq bazasy Qazaqstannyń batysynan jáne «QazTransGaz» AQ-nyń jerasty qoımalaryndaǵy gaz qorlarynan alynbaqshy. 

Qytaı tarapynan gazdy qabyldaý orny retinde «Qorǵas» shekara beketi anyqtaldy», delingen kompanııa habarlamada.

«QazTransGaz» UK AQ-nyń gaz tasymaldaý jáne marketıng jónindegi vıtse-prezıdenti Qaırat Sháripbaevtyń aıtýynsha, qazaqstandyq gazdy tasymaldaýdyń eksporttyq jáne tranzıttik baǵyttaryn ártaraptandyrý, sonymen qatar, kógildir otyndy eksporttaý kólemin arttyrý - Qazaqstan Prezıdenti qoıǵan negizgi strategııalyq talaptardyń biri.