Qazaqstan Qytaıǵa elektr energııasyn eksporttaý múmkindikterin qarastyryp jatyr
ASTANA. QazAqparat - Qazaqstan Ekibastuzdan Qytaıdyń Shyńjań-uıǵyr avtonomııasyna jeli salý arqyly elektr energııasyn eksporttaý múmkindigin qarastyrýda.
Bul týraly búgin Májilistegi Úkimet saǵatynda Energetıka mınıstri Vladımır Shkolnık málim etti.
Mınıstrdiń sózine qaraǵanda, Qazaqstannyń energetıkasyn eksporttaý áleýetin arttyrý maqsatynda perspektıvalyq baǵyttar qaralyp jatyr. «Bundaǵy mańyzdy baǵyttardyń biri Ekibastuzdan Shyńjań-Uıǵyr avtonomııasyndaǵy Hamı qosalqy stansasyna deıingi aralyqty qamtıtyn elektr jelisi qurylysyn salý bolyp otyr. Onda turaqty jeli boıynsha (+/-) 700 kVt kerneýlikti qamtýǵa bolatyn edi. Al bunyń ózi Qazaqstannyń 6 gVt elektr energııasyn Qytaıǵa eksporttaýǵa múmkindik berer edi», - deıdi mınıstr.
Onyń sózine qaraǵanda, kúrdeli bolǵanyna qaramastan, bul baǵytta kelissózder júrip jatyr. Sonymen qatar, vedomstvo basshysy atalmysh jospardyń qazaqstandyq eksportty áleýetti ete túsýge, bıýdjetti tolyqtyrýǵa múmkindigi zor ekenin alǵa tartady.
