Qazaqstan Qytaıǵa astyq jetkizý kólemin 1 mln. tonnaǵa deıin ulǵaıtýdy usyndy

ASTANA. QazAqparat - Qazaqstan Respýblıkasy Premer-Mınıstriniń orynbasary - Qazaqstan Respýblıkasy Aýyl sharýashylyǵy mınıstri Ómirzaq Shókeev Memlekettik azyq-túlik basqarmasy bastyǵynyń orynbasary Tszen Lıın hanymmen kezdesti, dep habarlaıdy QR AShM baspasóz qyzmeti.

Taraptar Qazaqstan men Qytaı arasyndaǵy astyq sektoryndaǵy yntymaqtastyq máselelerin talqylady.

Sonyń ishinde, Qazaqstannan QHR-ǵa ımporttalatyn astyqtyń kvotasyn 2019 jyly 500 myń tonnaǵa deıin jáne 2020 jyly 1 mln. tonnaǵa deıin ulǵaıtý máselesin talqylady.

Buǵan qosa, qazaqstandyq tarapqa qytaıdyń ishki astyq naryǵynyń basqa qatysýshylary arasynda kvota bólý usynyldy.

Qazirgi ýaqytta kvotalanǵan astyqtyń 95% «COFCO» memlekettik kompanııasy taratady.

Aıta keteıik, State Administration of Grain (SAG) astyq sektoryna jaýapty Qytaıdyń ákimshilik memlekettik mekemesi. SAG ulttyq azyq-túlik qaýipsizdigin qamtamasyz etý, astyq sektoryn damytýǵa járdemdesý, astyqty makro-retteýdi júzege asyrý, ortalyq astyq qoryn basqarý jáne halyqaralyq yntymaqtastyq pen almasýdy júzege asyrýmen aınalysady.