Qazaqstan Qytaıǵa astyq eksportyn ulǵaıtady - S.Omarov
ASTANA. QazAqparat - Qazaqstan bıyl Qytaıǵa astyq eksportyn ulǵaıtady. Bul týraly jýrnalısterdiń suraǵyna jaýap bere otyryp, Aýyl sharýashylyǵy vıtse-mınıstri Saparhan Omarov aıtty.
«Ózderińiz bilesizder, byltyr eksporttalǵan astyq kólemi 7,3 mln tonna bolǵan. Bıyl da astyqty eksporttaý kólemi osy shamada bolady dep jobalap otyrmyz. Astyqtyń eksportqa shyǵatyn taraptary - Orta Azııa memleketteri, Iran, Pákistan elderi. Bıyldan bastap, Qytaı memleketine eksporttaıtyn astyq kólemin ulǵaıtamyz degen jospar bar»,-dedi ol. Buǵan deıin aıtqanymyzdaı, bıyl bastyrylatyn astyqtyń taza salmaǵy 17,3 mln tonnany quraıdy degen boljam bar. «Qazǵarysh»-pen birge astyqtyń shyǵý jaǵdaıyna ǵaryshtan monıtorıng jasap otyramyz. Sol monıtorıngtiń bergen alǵashqy deregine súıensek, astyqtyń tazalanǵannan keıingi taza salmaǵy 17,3 mln tonnany quraıdy dep josparlap otyrmyz»,-dep tolyqtyrdy S.Omarov.
