Qazaqstan Qytaıǵa 135 taýar pozıtsııasy boıynsha $1 mlrd-qa jýyq shıkizattyq emes eksportty ulǵaıtýǵa daıyn
Bul týraly QazAqparat Úkimettiń resmı saıtyna silteme jasap habarlaıdy.
Taraptar birinshi jartyjyldyqtaǵy ekijaqty taýar aınalymynyń qarqynyn, tranzıttik-kólik salasyndaǵy birlesken jobalardy júzege asyrýdy, QR men QHR arasynda ózara mádenı ortalyqtardy ashýdy, 2024 jyly Qytaıda Qazaqstannyń týrızm jylyn uıymdastyrýdy jáne birqatar basqa da taqyryptardy qarastyrdy.
Premer-Mınıstr elder arasyndaǵy saýda-ekonomıkalyq yntymaqtastyq turaqty damyp kele jatqanyn atap ótti. Máselen, byltyr ózara saýda 34%-ǵa ósip, rekordtyq kórsetkishke – $24 mlrd-qa jetti. Birinshi jartyjyldyqtyń ózinde ol 20%-ǵa artyp, $13,6 mlrd qurady. Sonymen qatar 2030 jylǵa qaraı ekijaqty saýda kólemin $35 mlrd-qa deıin jetkizý boıynsha jumystar jalǵasýda.
Álıhan Smaıylov búginde Qazaqstannan Qytaıǵa shıkizattyq emes taýarlardy jetkizý kóleminiń artqany baıqalatynyn atap ótti. Atap aıtqanda, bıyl plastmassa buıymdaryn, metall konstrýktsııalaryn, un, kondıterlik jáne makaron ónimderin jetkizý bastaldy.
«Biz jetkiziletin taýarlar men qyzmetter nomenklatýrasyn keńeıtýimiz jáne elderimizdiń isker toptary arasynda kóbirek tikeleı baılanys ornatýymyz qajet dep sanaımyn. Osyǵan baılanysty biz Qytaıǵa 135 taýar pozıtsııasy boıynsha $1 mlrd-qa jýyq shıkizattyq emes eksportty ulǵaıtýǵa daıyn ekenimizdi málimdeımiz», — dedi ol.
Úkimet basshysy ınvestıtsııalyq yntymaqtastyqtyń mańyzdy ekenin basa aıtty. Qytaı dástúrli túrde Qazaqstan ekonomıkasyna ınvestor quıýshy elderdiń TOP-5 qataryna kiredi. Sońǵy 17 jylda Qytaıdan kelgen ınvestıtsııanyń jalpy kólemi $23,5 mlrd-qa jetti.
«Investıtsııa kólemin arttyrý boıynsha úlken áleýet bar ekenin kórip otyrmyz. Biz Qytaıdyń ınvestıtsııalyq qoǵamdastyǵyn birlesken jobalarǵa keńinen qatysýǵa shaqyramyz», — dedi Álıhan Smaıylov.
Óz kezeginde QHR-nyń Qazaqstandaǵy Elshisi Qytaı Halyq Respýblıkasynyń Tóraǵasy Sı Tszınpınniń Qazaqstanǵa memlekettik sapary barysynda Astanada jarııalaǵan «Bir beldeý, bir jol» bastamasyna bıyl 10 jyl tolatynyn eske saldy.
«Qazaqstan bul bastamaǵa alǵashqylardyń qatarynda qosylyp, ony júzege asyrýǵa belsendi túrde atsalysty. Bastama aıasynda kóptegen jumys atqaryldy. Búginde bizdi 11 temir jol jáne avtomobıl joldary, úsh munaı-gaz qubyry jáne «Qorǵas» shekara mańy yntymaqtastyǵy ortalyǵy biriktirip otyr. Kez kelgen seriktesimiz qol jetkizgen jetistikterimizge qyzyǵa qaraıdy dep aıtsaq, artyq emes. Bıylǵy jyl da ekijaqty qarym-qatynastardy damytý turǵysynan jemisti bolmaq», — dedi Chjan Sıao.
Sondaı-aq ol Qazaqstan Respýblıkasynyń Prezıdenti Qasym-Jomart Toqaevtyń Qytaıǵa mamyr aıyndaǵy saparynyń tarıhı mańyzdylyǵyn atap ótti, onyń barysynda birqatar mańyzdy memleketaralyq kelisimderge qol jetkizildi.
«Búgingi kúni bizdiń aldymyzda turǵan basty mindet – barlyq qol jetkizilgen ýaǵdalastyqtardy júzege asyrý», — dedi QHR-nyń QR-daǵy Elshisi.
