Qazaqstan Qytaıǵa 13 túrli taýar jetkizbek

ALMATY. QazAqparat - Qazaqstan Qytaı naryǵyna 13 túrli aýyl sharýashylyǵy ónimin jetkizetin boldy. Mundaı ýaǵdalastyqqa búgin Almatyda ótken Qazaqstan men Qytaı arasyndaǵy ІІ óńiraralyq forýmda qol jetkizildi, dep habarlaıdy QazAqparat tilshisi.

«Eki el arasyndaǵy taýar aınalymyn ulǵaıtý maqsatynda Qazaqstan metallýrgııa, mashına jasaý, hımııa men taǵam ónerkásibi salasynda otandyq taýar túrleri assortımentin kóbeıtedi. Osy taýarlar pozıtsııasy sheńberinde Qazaqstanda birqatar kásiporyn jumys istep tur», - dedi QR Premer mınıstriniń birinshi orynbasary, Qarjy mınıstri Álıhan Smaıylov.

Onyń aıtýynsha, Qytaıǵa ekologııalyq taza taýarlardy jetkizý áleýeti joǵary.

«Búginde otandyq aýylsharýashylyq ónimderiniń, atap aıtqanda, et, balyq, bıdaı, soıa burshaqtary, bal, un ónimderiniń 13 túrin Qytaıǵa jetkizý boıynsha kelisimge qol jetkizildi», - dedi ol.