Qazaqstan Qytaıǵa 1 mlrd dollardyń agroónimin eksporttaýǵa nıetti

  ASTANA. QazAqparat - Qazaqstan Qytaı naryǵyna mıllıard dollardyń aýyl sharýashylyǵy ónimin shyǵara alady. Bul týraly QR Parlamenti palatalarynyń birlesken otyrysynda depýtattardyń saýalyna jaýap bergen Úkimet basshysy Baqytjan Saǵyntaev  aıtty, dep habarlaıdy QazAqparat tilshisi.

«Búgingi kúni aýyl sharýashylyǵy úshin Qytaı naryǵy tolyqtaı ashyq deýge bolady. Eger biz búginde shamamen 150 mln dollardyń ónimderin jetkizetin bolsaq, múmkinshiligimiz mıllıard dollarǵa jetedi. Ózderińizde bilesizder, Qytaı óz naryǵyna jaıdan jaı jibere bermeıdi. Bul naryq tolyqtaı kvotalanady», - dedi Premer-Mınıstr.

Onyń aıtýynsha, Qazaqstannyń aýyl sharýashylyǵy Qytaı naryǵyna jylyna 1  mlrd dollardyń taýaryn eksporttaýǵa múmkinshiligi bar. Al bul elimizdegi agroónerkásip kesheniniń damýyna da óz septigin tıgizedi.

«2022 jylǵa qaraı ony 2,5 esege arttyrý mindeti qoıyldy. Buǵan qol jetkizýge bolady»,-  dedi ol.

Sonymen qatar Úkimet basshysy memlekettik-jekemenshik seriktestik aıasynda júzege asyrylatyn jobalarǵa da toqtaldy.

«2016 jyly bizde memlekettik-jekemenshik seriktestik aıasynda 23 joba boldy. Ótken jyly 400 mlrd teńgeniń 194 jobasy  bolǵan edi. Al 2018 jyly 1,5 trln teńgeniń 500 jobasyn iske qosýǵa tyrysatyn bolamyz. Munyń barlyǵy sońǵy nátıjede ekonomıkany ártaraptandyrýǵa alyp keletindigi sózsiz», - dedi Premer-Mınıstr.