Qazaqstan Qytaıdan keletin barlyq azamattar úshin karantın tártibin engizdi
«Álemdegi 41 memleket Ýhannan kelgenderge ǵana emes, búkil Qytaıdan kelgen azamattar úshin karantın tártibin engizip jatyr. Biz de búginnen bastap Qytaıdaǵy ınfektsııanyń taralý qaýpiniń aldyn alý úshin osy sharany qabyldadyq», - dedi Eljan Birtanov OKQ-da ótken baspasóz máslıhatynda.
Sonymen qatar mınıstrdiń aıtýynsha taǵy birqatar elde ınfektsııanyń qarqyndy túrde taralyp jatqan jaıy bar.
«Sol sebepti sanıtarlyq dárigerdiń qaýlysynda epıdemııalyq turǵyda jaısyz elderdi ekinshi sanatqa kirgizdik. Ol elderdiń qataryna 10 patsıenti bar memleketter ǵana emes, aýrýdy juqtyrý sıpaty jaǵynan erekshelengen elder de engizildi. Osyǵan baılanysty birqatar elderge nazar aýdaryp otyrmyz. Medıtsınalyq qyzmetkerler 14 kún monıtorıng jasaıdy. Kez kelgen azamat shekarany kesip ótken kezde biz onyń málimetterin turǵylyqty mekenjaıy boıynsha aýrýhanalarǵa tapsyramyz», - dedi ol.
Eger sheteldik azamat Qazaqstan aýmaǵyna kelse, ol jatqan qonaq úıge medıtsınalyq qyzmetker kelip, temperatýrasyn ólshep, jaǵdaıyn baqylaýǵa alady.
«Budan keıin qashyqtyqtaǵy monıtorıng qońyraý arqyly júrgiziledi. Bul sharalardyń bári de eń aldymen azamattardyń óz densaýlyǵy úshin jasalýda. Eń birinshi kezekte halyq densaýlyǵy úshin qolǵa alynǵan jumystar legi – osy», - dedi Eljan Birtanov.