Qazaqstan-Qytaı shekarasyndaǵy ótkizý pýnktinen bıýdjetke túsetin paıda 5,5 esege artqan

ASTANA. QazAqparat – Qazaqstan-Qytaı shekarasyndaǵy «Nur Joly» ótkizý pýnkti iske qosylǵannan bastap bıýdjetke túsken tólemder 5,5 esege artty. Mundaı derekterdi BAQ ókilderiniń qatysýymen ótken brıfıngide Memlekettik kirister komıteti tóraǵasynyń orynbasary Baqytjan Slıamov keltirdi, dep habarlaıdy QazAqparat tilshisi.

«Qazaqstan-Qytaı shekarasynda memleket pen jeke áriptestik mehanızmi arqyly «Batys Eýropa - Batys Qytaı» halyqaralyq tranzıttik dálizinde ornalasqan jańa «Nur Joly» avtomobıl ótkizý pýnkti 2018 jyly paıdalanýǵa berildi. Ótkizý pýnkti Orta Azııadaǵy eń iri jáne tehnologııalyq jaǵynan ozyq bolyp tabylady. Qurylysqa arnalǵan ınvestıtsııalyq shyǵyndar shamamen 69 mlrd teńge boldy.

Pýnkt jumys kúni 2,5 myń kólik quralyn jáne 15 myń jeke tulǵany ótkizýge qaýqarly. Ótkizý pýnkti jumys istegen 2018 jylǵy qazannan 2022 jylǵy qazanǵa deıingi aralyqta ol arqyly 209 432 kólik quraly ótti. 223 356 mln teńgeden astam kedendik baj ben salyq tústi. «Nur Joly» ótkizý pýnkti iske qosylǵannan bastap bıýdjetke túsken tólemder 5,5 esege artty», - dep málim etti Memlekettik kirister komıteti tóraǵasynyń orynbasary.

Baqytjan Slıamovtyń málimdeýinshe, eski «Qorǵas» ótkizý pýnktimen salystyrǵanda, «Nur Joly» beketindegi kólik aǵyny 1,6 ese ósip, odan túsken paıda 546,6 paıyzǵa artqan.

Sonymen qatar, ol jóndeýden keıin qaıta ashylǵan qazaq-ózbek shekarasyndaǵy «B. Qonysbaev» pýnktiniń ótkizý áleýeti de óskenin atap ótti.

Foto: ktze-commerce.kz