Qazaqstan-Qytaı shekarasynda ystyǵy kóterilgen eki jigittiń synamasynan vırýs tabylmady
TALDYQORǴAN. QazAqparat – Qytaıdan Qazaqstanǵa ótken eki qazaqstandyqtyń ystyǵy kóterilip, dárigerler olardan arnaıy synama alǵan bolatyn. Panfılov aýdany ákiminiń baspasóz qyzmeti taratqan aqparatqa sáıkes, aýrýhanaǵa jetkizilgen jigitterdiń densaýlyǵyna eshqandaı qaýip tónip turǵan joq, dep habarlaıdy QazAqparat tilshisi.
28 qańtarda Panfılov aýdanyndaǵy «Nur joly» beketinen ótken Qazaqstannyń eki azamatynyń temperatýrasy kóterilgenin arnaıy qurylǵy anyqtaǵan bolatyn. Olar aýdandyq ınfektsııalyq emhanaǵa shuǵyl jetkizildi. Arnaıy mamandar zertteý synamasyn alyp, eki azamatpen qarym qatynasta bolǵan 20 adamdy tolyq tekserýden ótkizgen. Zertteý qorytyndysyna sáıkes eki azamattan eshqandaı vırýstyń belgileri baıqalmady. Eki jigit búginde emhanadan shyǵyp, úılerine qaıtaryldy.
Aıta keteıik, aýdandaǵy «Qorǵas» shekara mańy halyqaralyq yntymaqtastyq ortalyǵy 22 qańtardan bastap jabyldy. Al, 29 qańtardan bastap «Nur joly» ótkizý pýnktinen jolaýshylardy tasymaldaıtyn avtobýstardyń qatynasy toqtatyldy.
