Qazaqstan-Qytaı shekarasynda ótkizý pýnktteriniń ınfraqurylymy jańartylýda
ASTANA. QazAqparat - Qazaqstan-Qytaı shekarasynda ótkizý pýnktteriniń ınfraqurylymyn jańartý isi júrgizilip jatyr, dep habarlaıdy QR Qarjy mınıstrligi Memlekettik kirister komıtetiniń baspasóz qyzmeti.
Kólik-logıstıka ınfraqurylymynyń damýy arqasynda Qazaqstan -halyqaralyq saýda dáliziniń basty oıynshysyna aınalýda. Ony ary qaraı jetildirý maqsatynda Qazaqstan Respýblıkasy men Qytaı Halyq Respýblıkasy shekarasynda keden beketteriniń fızıkalyq ınfraqurylymyn memlekettik-jekeshelik áriptestik qaǵıdatynda jańartý isi jalǵasyp keledi.
10 qazan kúni Qazaqstan-Qytaı shekarasynda «Qaljat» zamanaýı keden-logıstıkalyq ortalyǵynyń resmı ashylýy ótti. Bul ortalyq taýar aınalymy kóleminiń ulǵaıýyna jáne respýblıkanyń kóliktik-tranzıttik áleýetiniń artýyna septigin tıgizedi.
Sondaı-aq, kedende atap ótkendeı, shekarada kólik-logıstıka ınfraqurylymynyń salynýy júkterdiń eksporttyq-ımporttyq tasymaldanýynyń artýyna jaǵdaı jasap, ashyqtyq deńgeıin kóterýge, shekara mańyndaǵy saýda men kásipkerlikti damytýǵa múmkindik beredi. Osyǵan qosa, «keden ortalyqtarynyń jańartylýy búkil Kedendik odaqtyń (KO) tranzıttik áleýetin keden mańynda ınfraqurylym salý arqyly jetildirýdi talap etedi, bul arqyly ınfraqurylymdy paıdalana otyryp júktiń Ońtústik-Shyǵys Azııadan KO terrıtorııasyna, sol sııaqty Batys Eýropaǵa tasymaldanýyn arzandatýǵa ári tezdetýge bolady», - dedi Memlekettik kirister komıtetiniń tóraǵasy Ardaq Teńgebaev.
«Ortalyq jumysy bir tereze negizinde qurylǵan, barlyq qyzmetter jedel túrde kórsetiledi, kásipkerler men syrtqy ekonomıkalyq qyzmettiń qatysýshylary úshin jaǵdaılar jasalǵan. Jańa aqparattyq júıe kásipkerler ýaqytyn aıtarlyqtaı únemdeıtin bolady jáne de olar júkterdiń suryptalýyna, saqtalýyna ári tańbalanýyna qatysty qyzmetterdiń keń aýqymyna qol jetkizip qana qoımaı, qyzmet alý kezinde jaıly jumys isteý úshin ǵalamtory bar bıznes-rýmde jáne basqa da jaǵdaılar jasalǵan demalys bólmesinde bola turýǵa múmkindik alady», - dep atap ótti "EurotransitLogistic" JShS dırektory Erlan Dıhanbaev.
Kólik-logıstıka ortalyqtarynyń (KLO) bútindeı bir kesheni qurylysynyń aıaqtalýy shekaradaǵy logıstıkalyq ınfraqurylymnyń tıimdiligin tolyq sheshýge jol ashady. Taýar jáne kólik aǵynyn óńdeýge, sondaı-aq júkterdi kedendik óńdeýden ótkizýge qatysty qyzmetterdiń keń aıasyn qamtamasyz etip otyrǵan «Qaljat», «Bahty», «Dostyq», «Qorǵas», «Altynkól» jáne «Maıqapshaǵaı» pýnktteri Qazaqstandy halyqaralyq ǵalamdyq kólik-logıstıka júıesimen biriktirýge múmkindik beredi. Bolashaqta Qazaqstanda shekara mańyndaǵy kólik-logıstıka ınfraqurylymyn damytý isi Eýrazııanyń eń iri logıstıka júıesin qurýǵa alyp keledi.
Joba QR Qarjy mınıstrliginiń Memlekettik kirister komıteti men "EurotransitLogistic" JShS memlekettik-jekeshelik áriptestigi negizinde júzege asýda.
