Qazaqstan-Qytaı shekarasynda avtokólik ótkizetin 5 bekettiń 3-eýi ǵana jumys istep tur

NUR-SULTAN. QazAqparat – QR Qarjy, QR Indýstrııa jáne ınfraqurylymdy damytý jáne QR Syrtqy ister mınıstrlikteri Qazaqstan-Qytaı shekarasyndaǵy pýnktterde ótkizý múmkindikterin arttyrý boıynsha sharalardy ázirleýde, dep habarlaıdy QazAqparat.

QR Qarjy mınıstrliginiń baspasóz qyzmetinen málim etkendeı, usynylǵan sharalar týraly QR Premer-Mınıstriniń birinshi orynbasary Álıhan Smaıylovtyń tóraǵalyǵymen ótken kezekti keńeste aıtyldy.

«Qarjy mınıstrliginiń Memlekettik kirister komıteti (MKK) Qytaı tarapymen «Qaljat-Dýlaty» jáne «Maıqapshaǵaı-Zımýnaı» ótkizý pýnktterin ashý týraly kelissózder júrgizýde. Sondaı-aq, MKK qytaılyq tarap qabyldaıtyn avtokólik quraldarynyń sany belgilengen baqylaý-ótkizý pýnktteri arqyly taýarlardy ótkizý tártibin (reglament) aıqyndaýdy jáne jemister men kókónisterdi tasymaldaýshylar úshin «jasyl dáliz» uıymdastyrý qajettiligin alǵa tartýda», - delingen aqparatta.

Mınıstrlikten atap ótkendeı, «Nur joly» baqylaý-ótkizý beketinde kontaktisiz júk tasymaly qytaılyq tirkemelerdiń kólik-logıstıkalyq ortalyǵyna (KLO) kirýine múmkindik berý arqyly júzege asyrylýda.

«Bıylǵy 10 qarashadan osy model boıynsha qytaı taýarlary bar 538 kólik tirkemesi ákelindi. Olar mejeli aımaqtarǵa ótý úshin KLO-da qazaqstandyq tasymaldaýshylardyń kólikterine qaıta júkteldi. Qazaqstannyń Syrtqy ister mınıstrliginiń málimetine sáıkes, Qytaı tarapy júkterdi KLO-da kontaktisiz tasymaldaý úshin tartqyshtar sanyn kóbeıtýdi suraıdy.

Komıtet júkterdi «Nur joly» baqylaý-ótkizý beketindegi kólik-logıstıkalyq ortalyqtan túsirgennen keıin qaıtyp kele almaıtyn qytaı tirkemelerin qaıtarý mehanızmin ázirlep jatyr. Sondaı-aq, «Nur joly» beketi jumys ýaqyty QHR Memlekettik keden qyzmetkerleriniń jumysymen sáıkestendiriledi dep josparlanýda», - dedi QR Qarjy mınıstrliginiń baspasóz qyzmetinen.

A.Smaıylov tasymaldaýǵa qatyspaıtyn avtomobılder men kólik quraldarynyń kezegin boldyrmaý maqsatynda bıylǵy 23 qazanda engizilgen elektrondy kezekti eki aı ishinde ýákiletti organdardyń málimetter bazasymen ıntegratsııalaýdy tapsyrdy.

QR Syrtqy ister mınıstrliginiń habarlaýynsha, QHR bıligi qabyldaǵan sharalar sondaı-aq, Reseı, Mońǵolııa jáne Qyrǵyzstanmen shekarada kirý rejıminiń kúsheıýine ákeldi. Reseı-Qytaı shekarasyndaǵy baqylaý-ótkizý beketteri de óte shekteýli rejımde jumys isteıdi, bul kóbinese shekara aımaǵynda keptelisterge alyp kelýde.

«Aǵymdaǵy jyldyń 9 aıynyń qorytyndysy boıynsha júk tasymaldaý kólemi ótken jyldyń sáıkes kezeńimen salystyrǵanda 70% tómendedi. Aıta keteıik, Qazaqstan-Qytaı shekarasyndaǵy 5 avtokólik beketiniń tek 3-eýi ǵana jumys isteýde. QHR jaǵynan «Dýlaty» (Qazaqstan jaǵynanan – «Qaljat») jáne «Zımýnaı» (Qazaqstan jaǵynan – «Maıqapshaǵaı») ótkizý pýnktteri jabyldy», - delingen taratylǵan aqparatta.