Qazaqstan-Qytaı saýdasyn jeńildetý úshin qandaı sharalar atqarylady
"Taraptar ekonomıkalyq jahandaný men saýdany yryqtandyrýǵa atsalysyp, básekelestiktiń ádil sharttaryn, ashyq, tolerantty, tepe-teń ári ózara tıimdi ekonomıkalyq saıasatty júrgizýge múddeli", - delingen birlesken málimdemede.
Qazaqstan men Qytaı saýdany barynsha ulǵaıtyp, ekijaqty taýar aınalymyn arttyrýdyń tyń joldaryn paıdalanady. Osy oraıda ótkizý beketterin salý sııaqty shekara ınfraqurylymyn damytý, kedendik baqylaý, tekseristerdiń nátıjelerin ózara taný, quqyq qorǵaý salasynda aqparat almasý, sondaı-aq xalyqaralyq saýdanyń "bir tereze" júıesin qurý salasynda tyǵyz jumys jasaý josparlanǵan. Eki eldiń úkimetteri "Qorǵas" xalyqaralyq ortalyqtyń tıimdiligin arttyrýy qajet. Qazaqstan men Qytaı basshylary mınıstrlikter deńgeıinde úılestirý mexanızmin qurýdy qoldady. Sonyń arqasynda ortaq josparlardy barynsha úılestirip, tıimdi iske asyrýǵa bolady.
Budan bólek, taraptar temirjol jelisimen xalyqaralyq júk tasymalyn ulǵaıtýǵa kelisti. Sonyń ishinde "Qytaı-Qazaqstan-Ortalyq Azııa", "Qytaı-Qazaqstan-Eýropa", "Qytaı-Qazaqstan-Parsy shyǵanaǵy elderi" sııaqty baǵyttar bar. Aldaǵy ýaqytta logıstıkalyq shyǵyndardy azaıtý, kedendik rásimderdi jeńildetý, júk tasymaly úshin tıimdi sharttar jasalady. Jalpy, Qazaqstan men Qytaıdyń basshylary "Bir jol, bir beldeýdi" qurý sharalaryna oń baǵa berip, "Nurly jol" baǵdarlamasyn atalǵan bastamamen ushtastyrýdyń mańyzdylyǵyn erekshe atap ótti.
Resmı málimetke sáıkes, ótken jyly Qazaqstan men Qytaı arasyndaǵy saýda-sattyqtyń kólemi 10,4 mlrd dollardy (2016 jylmen salystyrǵanda, 32,6 protsentke artyq) qurady. Sonyń ishinde 5,8 mlrd dollar qazaqstandyq eksport bolsa, Qytaıdan kelgen ımport 4,7 mlrd dollarǵa kóterildi.
Aıta keteıik, QR Prezıdenti Nursultan Nazarbaevtyń QHR-ǵa jasaǵan resmı sapary barysynda eki eldiń basshylary birlesken málimdemege qol qoıǵan bolatyn. BAQ ókilderine suhbat bergen Elbasy ulttyq valıýtamen saýda-sattyq júrgizý ne úshin qajet ekenin aıtty. Sondaı-aq, Prezıdent qytaılyq bıznesmenderge «Astana» halyqaralyq qarjy ortalyǵynyń jumysy jaıynda aıtyp berdi.
