Qazaqstan-Qytaı komıssııasynyń kezekti otyrysynda 2010 jyldan bastap elimizdiń astyǵyn Qytaıǵa jetkizý úshin kvota alý máselesi talqylanady

Bul týraly búgin QR Parlamenti Májilisinde ótken Úkimet saǵatynda Aýyl sharýashylyǵy mınıstri Aqylbek Kúrishbaev málim etti, dep habarlaıdy QazAqparat.  

«Qazirgi kúni Syrtqy ister mınıstrligine syrtqy naryqqa qazaqstandyq astyq pen undy shyǵaryp satý máselesine qatysty  tapsyrmalar júktelip, ol úshin Qazaqstan elshilikteriniń jumysyn belsendire túsý mindeti júkteldi. Sonymen birge, aldaǵy ýaqytta ótetin Qazaqstan-Qytaı yntymaqtastyq komıssııasynyń kezekti otyrysynda 2010 jyldan bastap qazaqstandyq astyqty Qytaıǵa tasymaldaý jónindegi kvotany ashý máselesin talqylaý josparlanyp otyr», dedi A. Kúrishbaev.

Budan basqa, mınıstrdiń aıtýyna qaraǵanda, Úkimet basshysy Qarjy mınıstrligine «QazAgro» Ulttyq holdıngimen birlese otyryp, osy holdıng tarapynan berilgen kredıtterdiń jekelegen bóligin óteýdi soza túsý máselesin pysyqtaýdy júktegen.  Atalǵan nesıeler aýyl sharýashylyǵymen aınalysýshylar úshin kóktemgi egis jáne kúzgi jıyn-terim naýqany úshin berilgen bolatyn. Sonymen birge, «Agrarlyq nesıe korporatsııasy» AQ men «QazAgro» AQ tarapynan kredıtter men lızıngtik tólemderdi 1 jylǵa deıin sozý sharalary da qarastyrylyp jatyr.