Qazaqstan Qytaı, Iran, BAÁ jáne Saýd Arabııasyna aýylsharýashylyq ónimder eksportyn arttyrady
«Biz eksport jaǵdaıyn zerttep, máselelerdi sheshý joldaryn tabýdy maqsat etip qoıdyq. Bıznes, memlekettik qyzmetshiler, sarapshylardy jınap, túrli talqylaý jıyndaryn ótkizdik», - dep jazdy QR Aýyl sharýashylyǵy vıtse-mınıstri Nurjan Áltaev óziniń Facebook-tegi paraqshasynda.
Eksport máselelerin zertteýge saraptamalyq qurylymdar men ǵalymdar da shaqyrylǵan.
«Eksport damýyndaǵy máselelerdi zertteý qorytyndysyna sáıkes, AÓK ónimderiniń eksportyn damytý boıynsha arnaıy «jol kartasyn» ázirlep jatyrmyz», - dep atap ótti ol.
Sonymen birge, qazirgi ýaqytta Qazaqstan buryn-sońdy eksport jasalmaǵan jańa naryqtardy tapty. Atap aıtqanda, Qytaımen balyq sharýashylyǵy, asyl tuqymdy jylqylar, qoı eti, bal, astyq, soıys maly boıynsha hattamaǵa qol qoıylǵan.
«2018 jyly sıyr, shoshqa etterine, dándi daqyldardyń (arpa, júgeri, kúrish), dándi-burshaqtardyń (burshaq, úrmeburshaq, mash), jem-shópterdiń (jońyshqa), maıly daqyldardyń (zyǵyr, raps, maqsary) jáne baqsha daqyldarynyń (qarbyz, qaýyn, kádi) keı túrlerine talaptar kelisiledi. Kelesi jyldyń qorytyndysy boıynsha, Qytaıǵa eksport kólemi 20%-ǵa artýy tıis», - dep atap ótti vıtse-mınıstr.
Iranmen Qazaqstannan qoı jáne salqyndatylǵan qoı etterin jetkizge arnalǵan veterınarlyq talaptar bekitilgen. 2017 jyly Iranǵa alǵash ret tiri qoılar men qoı etteri eksporttala bastady.
«Jańa jyl basynda sıyr eti men múıizdi iri qara malǵa arnalǵan talaptar bekitiledi. Sondaı-aq, Iranǵa astyq tasymaldaýǵa salynǵan tyıymǵa qatysty erekshe talaptardy maquldaýdan ótkizdik. Bıdaı jetkizý boıynsha «Prodkorporatsııa» UK» AQ men ırandyq kompanııalar arasynda kelisimshart bekitildi», - dep habarlady Nurjan Áltaev.
Qazaqstan Birikken Arab Ámirlikterimen et jáne et ónimderin jetkizý boıynsha veterınarlyq sertıfıkatty bekitken. Nátıjesine alǵash ret Birikken Arab Ámirlikterine muzdatylǵan sıyr eti eksporttaldy. Onyń aıtýynsha, kelesi jyly BAÁ-ge mal sharýashylyǵy ónimderi eksportyn 30-50%-ǵa arttyrý kózdelip otyr.
Saýd Arabııasyna qatysty bizdiń memleket usaq jáne múıizdi iri qara maldy jáne sıyr, qoı etterin jetkizýge salynǵan shekteýdi alyp tastady. Endi jańa jylda veterınarlyq sertıfıkat bekitilip, mal sharýashylyǵy ónimderi eksporttala bastaıdy.
QR Aýyl sharýashylyǵy vıtse-mınıstriniń habarlaýynsha, 2016 jylmen salystyrǵanda qazaqstandyq AÓK óniminiń eksporty 11 paıyzǵa - 1580,3 mln dollardan 1758,2 mln AQSh dollaryna deıin ósken.