Qazaqstan-Qytaı gaz qubyry arqyly elimizdiń ońtústigine beriletin gaz bes mlrd. tekshe metrge artady
ASTANA. 13 maýsym. QazAqparat -Búgin Parlament Senatynyń jalpy otyrysynda palata depýtattary «2007 jylǵy 18 tamyzdaǵy Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy
Qazaqstan-Qytaı gaz qubyryn salý men paıdalanýdaǵy yntymaqtastyq týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» zańdy qabyldady.
Qujattyń negizgi maqsaty - Qazaqstan-Qytaı gaz qubyrynyń birinshi ýchaskesiniń qýatyn Qytaıǵa túrkimen jáne ózbek gazyn tranzıtteý, paıdalanýǵa berilgen «A» jáne «V» jelilerimen birge biryńǵaı dálizde úshinshi «S» jelisin salý jolymen ulǵaıtý maqsatynda 2007 jyldyń 18 tamyzyndaǵy kelisimge ózgerister men tolyqtyrýlar engizý bolyp tabylady. Bul rette úshinshi «S» jelisin salýǵa respýblıkalyq bıýdjet qarajaty tartylmaıdy, oǵan Qytaı tarapynyń ınvestıtsııalary jumsalatyn bolady.
Hattamaǵa sáıkes, Túrkimenstannan jáne Ózbekstannan shyǵatyn gaz Qazaqstannyń ońtústik oblystarynda ishki tutyný úshin gaz qubyrynyń birinshi ýchaskesiniń «S» jelisi arqyly berilýi múmkin. Bul rette Munaı jáne gaz mınıstri Saýat Myńbaevtyń aıtýynsha, Qazaqstan tarapy úshin ishki paıdalanýǵa gazdy bes mlrd. tekshe metrge ulǵaıtylady.
Gaz qubyryn senimdi jáne qaýipsiz paıdalanýdy qamtamasyz etý maqsatynda taraptar ondaǵy tótenshe jaǵdaılar kezinde is-qımyldardy úılestirýdiń ekijaqty nemese kópjaqty tetigin jasaıdy. Qazaqstannyń ońtústik oblystarynda ekinshi ýchaske boıynsha beriletin gazdyń jetispeýshiligine alyp kelgen tótenshe jáne aldyn alýǵa bolmaıtyn jaǵdaılar oryn alǵanda Qazaqstannyń ýákiletti uıymy kelisilgen josparǵa sáıkes birinshi ýchaskeniń «S» jelisi boıynsha tasymaldanatyn tranzıttik gazdy shuǵyl irikteýdi júzege asyrýǵa, al qajet bolǵan jaǵdaıda «A» jáne «V» jelileri boıynsha júrgizýge quqyly.
