Qazaqstan Qytaı arqyly Ońtústik-Shyǵys Azııaǵa astyq eksporttaýdy jolǵa qoımaq

ASTANA. QazAqparat - Qazaqstan Qytaı arqyly Ońtústik-Shyǵys Azııaǵa astyq eksporttaýdy jolǵa qoımaq. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Aýyl sharýashylyǵy mınıstrligi Agroónerkásip keshenindegi memlekettik ınspektsııa komıtetiniń tóraǵasy Saqtash Qasenov málim etti.

«Qazaq astyǵyna ár ýaqytta da suranys bar. Bizdiń negizgi naryqtarymyz - Iran, Túrkııa, Reseı, Ázerbaıjan, Qyrǵyzstan, Ózbekstan, Tájikstan elderi. Qazirgi ýaqytta bizde Ońtústik-Shyǵys Azııa elderi men Qytaıǵa astyǵymyzdy eksporttaýǵa baǵyttalǵan jumystar júrgizilýde», - dedi ol.

Komıtet tóraǵasynyń atap ótýinshe, Ońtústik-Shyǵys Azııa elderine astyq eksporttaý máselesi búginde óz sheshimin tapty dese de bolady.

«Sońǵy 3-4 jyl boıy biz Qytaıǵa astyq eksportyn jyldan-jylǵa eselep kelemiz. Budan bólek, bolashaqta Qytaı arqyly Ońtústik-Azııa elderine, onyń ishinde Ońtústik Koreıaǵa shyǵý múmkindigi qarastyrylýda», - dedi S.Qasenov.