Qazaqstan qysqy Olımpıadany ótkizýge taǵy ótinish bere me
Mınıstrdiń aıtýynsha, búginde qysqy sport túrleri boıynsha kóptegen nysandar salynýda. Osy oraıda Arystanbek Muxamedıuly "Býrabaı" xalyqaralyq shańǵy bazasyndaǵy tramplın qurylysyn uzartýdyń sebebin de túsindirdi. "Máselen, jaqynda ǵana Elbasymyz Şýchınskige baryp, xalyqaralyq sport ortalyǵyn ashty. Ol jerde tamasha tramplın de bar. Kóbisi osy nysannyń qurylysy nege qatty uzaryp ketti dep suraıdy. Ashyǵyn aıtý kerek, qurylys kompanııasyna qatysty birqatar qıyndyqtar boldy. Sosyn bas kezinde atalǵan nysan sportshylardyń oqý-jattyǵýlaryn ótkizetin oryn bolady dep josparlanǵan. Artynan xalyqaralyq jarystarǵa arnap salýǵa bolady degen sheshimge keldik. Sóıtip, tórt jyl buryn tujyrymdamasyn ózgerttik. Sebebi biraz aqsha quıylǵannan keıin ony jan-jaqty paıdalaný qajet", - dedi A.Muxamedıuly sport salasynyń úzdikterin marapattaýǵa arnalǵan sharada.
Onyń sózine qaraǵanda, búginde Astana men Almaty qysqy Olımpıada oıyndaryn ótkizýge daıyn. Máselen, "Alaý" sport kesheninde konkı jarystaryn ótkizýge bolady. Al "Barys-Arena" xokkeı matchtaryn uıymdastyra alady. Budan bólek, shańǵy, bıatlon, mánerlep syrǵanaý jáne taǵy basqa sport túrleri boıynsha ınfraqurylym bar. "Sondyqtan biz qysqy Olımpıada oıyndary esh qıyndyqsyz ótkize alamyz. Qazaqstanda xalyqaralyq jarystardy mindetti túrde ótkizý kerek. Búginde dúnıejúzi Olımpıada oıyndary, ıa bolmasa, fýtboldan Álem chempıonaty úshin talasyp jatady. Sebebi ondaı sharalar kóp nárseni ózgertedi. Máselen, Reseıde chempıonat ótkennen keıin xalyqtyń sportqa degen qushtarlyǵy artty. Mıllıondaǵan jastar fýtbolǵa qyzyǵa bastady. Ótken jyly Elbasy EKSPO aıasynda Ispanııa korolimen kezdesti. Ol aıtady, Barselonada ótken Olımpıadadan keıin osy eldiń ekonomıkasy, xalyqtyń sanasy ózgerdi. Sondyqtan aldaǵy ýaqytta múmkindik bolsa, qysqy Olımpıadany ótkizýge ótinish beremiz. Árıne, aldymen saıası sheshim bolýy kerek. Endi, 2022 jylǵy qysqy Olımpıadany ótkizý úshin Beıjińmen talastyq. Sol kezde úsh-aq upaımen qalyp qoıdyq. Degenmen, keleshekte usynys qalaı túsedi, solaı birden ótinishimizdi beremiz", - dedi A.Muxamedıuly QazAqparat tilshisine bergen suxbatynda.
Aıta keteıik, 2015 jyly Qazaqstan qysqy Olımpıada oıyndaryn ótkizýge ótinish bergen bolatyn. Sol kezde daýys berý nátıjesi boıynsha Qytaıdyń Beıjiń qalasy jeńiske jetti. Bıylǵy aq Olımpıada Ońtústik Koreıanyń Pxenchxan qalasynda ótti. Tórt jyldan keıin Beıjińde ótedi. 2026 jylǵy úmitkerler áli anyqtalǵan joq.
