Qazaqstan qyrkúıek aıynyń sońyna deıin 3,8 mln. tonna astyq eksporttaıdy

ASTANA. 26 maýsym. QazAqparat - Qazaqstan qyrkúıek aıynyń sońyna deıin 3,8 mln. tonna astyq eksporttaıdy. Bul týraly búgin Aýyl sharýashylyǵy mınıstrliginde ótken baspasóz máslıhatynda «QazAgro» holdınginiń  basqarýshy dırektory Baqyt Qudasbaeva málim etti.

Onyń atap ótýinshe, qazirgi ýaqytta negizgi astyqty soltústik óńirlerdegi elevatorlarda shamamen 7 mln tonna astyq bar. Olardy jańa ónim jınalǵanǵa deıin bosatý úshin «Azyq-túlik kelisimshart korporatsııasy» elimizdiń batys, ońtústik jáne shyǵys oblystaryna astyqty jóneltýde.

«Qazirgi ýaqytta 133 mln tonna astyq aımaqtarǵa jetkizildi. Jalpy 500 myń tonna astyqty óńirlerge jetkizý josparlanǵan»,  - dedi ol.

Basqarma tóraıymynyń sózine qaraǵanda, óńirlerge astyqty jetkizý barysynda vagondardyń jetispeı qalý problemasy týyndaǵan. Degenmen bul problemalar ýaqytyly  sheshildi. Endigi meje qyrkúıek aıyna deıin qalǵan astyqty jetkizý bolyp tur.

«Osydan keıin 3,8 mln. tonna kólemindegi astyqty aǵymdaǵy jyldyń qyrkúıek aıynyń sońyna deıin eksportqa shyǵarý qajet», - dep atap ótken B.Qudasbaevanyń aıtýynsha, jyl basynan bergi aralyqta Qazaqstan 11 mln. tonnadan astam astyqty eksportqa jóneltken.