Qazaqstan Qyrǵyzstanmen tatý kórshi qatynasyn únemi qoldaıdy - sarapshy
ASTANA. QazaAqparat - QR Prezıdenti janyndaǵy Qazaqstannyń strategııalyq zertteýler ınstıtýty (QSZI) dırektorynyń orynbasary Sanat Kóshkimbaev qazaq-qyrǵyz shekarasynda tasymaldanyp jatqan ónimderge baqylaý júrgizýge qatysty pikirin bildirdi, dep habarlaıdy «QazAqparat» HAA tilshisi.
«Qyrǵyzstan EAEO quramyna ene otyryp, Qazaqstan tarapynan óz ekonomıkasyna demeý taba bildi. Sol kezdiń ózinde Qazaqstan tarapynan fıtosanıtarlyq, veterınarlyq baqylaý máselelerin, kedendik ákimshilendirý erejeleri týraly sóz qozǵalǵan bolatyn. Bul týraly keshe QR Premer-Mınıstri Baqytjan Saǵyntaev Qyrǵyz Premer-Mınıstrimen kezdesýde de aıtty», - deıdi Sanat Kóshkimbaev.
Onyń aıtýynsha, barlyq sarapshylar sol tusta-aq aıtarlyqtaı statıstıkalyq qatelikterge nazar aýdarǵan. Atap aıtqanda, Qyrǵyzstannyń Qytaımen saýdadaǵy statıstıkalyq kórsetkishteri bir sandy kórsetse, dál osy turǵydaǵy qytaılyq statıstıka basqa málimetterdi jarııalaǵan.
«Kóptegen sarapshylar, qazaqstandyq óndirýshiler, qaýymdastyqtar naqty normatıvterdi engizý qajet ekeni týraly sóz qozǵaǵan bolatyn. Qazaqstan tarapy dostyq qarym-qatynasty, tatý kórshilik pen seriktestikti eskere otyryp, qyrǵyz eksporttaýshylarynyń buzýshylyqtary sekildi kóptegen máselelerge kóz juma qarap kelgen. Bul da óz kezeginde qyrǵyz ekonomıkasyna qoldaý bildirý ádisteriniń biri boldy. Ol kezde eldiń ekonomıkalyq jáne áleýmettik jaǵdaı eskerildi. Árıne, munyń bári qyrǵyz eksporttaýshylary men óndirýshileri óz jumystaryn tártipti retke keltirer degen senimde jasalǵan edi », - deıdi sarapshy.
Sanat Kóshkimbaev qyrǵyz taýar óndirýshileri artylǵan senimdi joǵaltyp alǵanyn alǵa tartady.
«Birinshi ret, odan keıin ekinshi márte ustalǵannan keıin aqyry senimniń kúli kókke ushady. Barlyq fıtosanıtarlyq sharalar qatań túrde júzege asyrylýy kerek. Sút ónimderi, et, jemis-jıdek jáne basqa da aýyl sharýashylyǵy ónimderine shekarada qatań ári naqty baqylaý júrgizilýi tıis. Óıtkeni, ol ónimder normalarǵa saı bolý kerek. Máselen, qazaqstandyq eksporttaýshylar Reseı nemese Qytaıǵa et tasymaldaý barysynda óte myqty básekelik orta bolǵandyqtan, barlyq tekserýler men zerthanalyq zertteýlerden ótedi. Árbir memleket óz halqynyń densaýlyǵyn oılaıtyndyqtan, bul qadamǵa barýyn óte durys dep esepteımin. Demek, qazaqstandyq tutynýshylar Qyzǵyzstan ekonomıkasyna demeý bildirýdi oılaǵanymen, qyrǵyz tarapy máselelerdi sheshýge asyǵar emes. Sondyqtan bul máseleniń jyry áride jatyr», - deıdi ol.
Sonymen qatar, sarapshy Qazaqstan tarapy árdaıym Qyrǵyzstanmen dostyq qarym-qatynasty saqtaýǵa kúsh salyp kele jatqanyn atap ótti.
«Bul máselede qyrǵyzdar jaǵynan jaǵdaıdy retke keltirý úshin naqty qadamdar jasalsa jón bolar edi. Olarda qashan da parlamenttik nemese prezıdenttik saılaý eken dep máselege kóz juma qaraýǵa bolmaıdy. Qyrǵyz tarapy árdaıym máselelerdi sheshýdiń ornyna, týyndaǵan jaǵdaıdy aqtaýǵa tyrysady. Sondyqtan tártipti retke keltirip, uzaq merzimdi, turaqty jáne ózara tıimdi qarym-qatynasty ornatatyn ýaqyt keldi dep oılaımyn», - dep túıdi sarapshy.
Foto kisi.kz
