Qazaqstan Qyrǵyzstanmen aradaǵy quqyq qorǵaý organdaryna qatysty shartty toqtatty: Aqorda Prezıdent Jarlyǵyn túsindirdi
Oǵan súıensek, 1997 jylǵy 8 sáýirde Qazaqstan Respýblıkasy qylmystardy anyqtaýǵa, ashýǵa jáne tergep-tekserýge járdemdesý maqsatynda Qazaqstan Respýblıkasy men Qyrǵyz Respýblıkasy aýmaǵyna quqyq qorǵaý jáne arnaýly organdary qyzmetkerleriniń kelý tártibi men ózara is-qımyldary týraly shartqa qol qoıǵan.
Búginde Qazaqstannyń qylmystyq jáne qylmystyq-protsestik zańnamasyndaǵy eleýli ózgeristerge baılanysty atalǵan sharttyń erejeleri eskirdi.
Buǵan qosa, buryn ony iske asyrýǵa ýákilettik berilgen Qazaqstan Respýblıkasynyń vedomstvolary (Memlekettik tergeý jáne Memlekettik keden komıtetteri) taratyldy.
Onyń ústine, shartta kózdelgen osy saladaǵy yntymaqtastyq Táýelsiz Memleketter Dostastyǵy sheńberinde jasalǵan basqa halyqaralyq kelisimdermen:
- TMD-ǵa múshe memleketterdiń aýmaqtarynda quqyq qorǵaý organdary qyzmetkerleriniń bolýy men ózara is-qımyl tártibi týraly shartpen (2000 jylǵy 28 sáýirdegi № 44-II QR Zańymen ratıfıkatsııalanǵan);
- TMD-ǵa qatysýshy memleketterdiń adamdardy memleketaralyq izdestirý týraly shartymen (2013 jylǵy 16 qazandaǵy № 135-V QR Zańymen ratıfıkatsııalanǵan);
- TMD-ǵa qatysýshy memleketterdiń adamdardy memleketaralyq izdestirýdi júzege asyrý jónindegi quzyretti organdarynyń reglamentimen (TMD úkimet basshylary keńesiniń 30.10.2015 jylǵy sheshimimen bekitilgen) retteledi.
Atalǵan sharttyń qoldanylýyn toqtatý máselesi qyrǵyz tarapymen kelisilgen jáne qylmysqa qarsy is-qımyl salasyndaǵy ekijaqty yntymaqtastyq úshin teris quqyqtyq saldarǵa ákep soqpaıdy.
Osyǵan baılanysty «Qazaqstan Respýblıkasynyń halyqaralyq sharttary týraly» Zańnyń 18-babynyń 3-tarmaǵyna sáıkes Memleket basshysynyń Qazaqstan tarapynyń atalǵan halyqaralyq shartqa qatysýshy bolmaý nıeti týraly Jarlyǵy qabyldandy.
