Qazaqstan Qyrǵyzstanǵa júzim jáne qurma ónimderin keri qaıtardy

ASTANA. QazAqparat - Qazaqstan Qyrǵyzstanǵa 4,2 tonna júzim jáne qurma ónimin keri qaıtardy, dep habarlaıdy QazAqparat QR AShM baspasóz qyzmetine silteme jasap.

«Qyrǵyzstan Respýblıkasynan kelgen 4,2 tonna júzim jáne qurma óniminen Azııalyq jemis shybyny zııankesi anyqtaldy», delingen baspasóz habarlamasynda.

Bul ónimder 21 qarashada Jambyl oblysynyń Qordaı aýdanynda karantındik fıtosanıtarlyq baqylaýlar júrgizý barysynda belgili bolǵan.
Eýrazııalyq ekonomıkalyq odaqtyń ósimdikter karantıni salasyndaǵy zańnamasynyń buzylýyna baılanysty atalǵan karantındik ónimder Qyrǵyz Respýblıkasynyń aýmaǵyna keri qaıtaryldy.
Aıta keterligi, Azııalyq jemis shybyny - daqyldardyń 60-tan astam túrlerin zaqymdap, jemisin shiritip, qoldanýǵa jaramsyz etedi.