Qazaqstan Qyrǵyzstanǵa óteýsiz áskerı-tehnıkalyq kómek kórsetedi

NUR-SULTAN. QazAqparat – Májilistiń jalpy otyrysynda «Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy óteýsiz áskerı-tehnıkalyq kómek kórsetý týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Qazaqstan Úkimeti men Qyrǵyzstan Úkimeti arasyndaǵy óteýsiz áskerı-tehnıkalyq kómek kórsetý týraly kelisim 2021 jylǵy 2 naýryzda Nur-Sultan qalasynda jasalǵan.

«Kelisim qyrǵyz tarapyna áskerı múlikti, atap aıtqanda, oq-dáriler men arnaıy jabdyqty bir ret berýdi kózdeıdi. Qazaqstan tarapy áskerı múlikti Qyrǵyz Respýblıkasynyń Qoı-Tash eldi mekenine deıin avtomobıl kóligimen jetkizýdi qamtamasyz etip, oǵan baılanysty barlyq shyǵysty ózi kóteredi», - dedi QR Qorǵanys mınıstriniń orynbasary Rýslan Shpekbaev.

Onyń aıtýynsha, qyrǵyz jaǵy Qazaqstannan alǵan áskerı múlikti, ony paıdalaný quqyǵyn úshinshi tarapqa bermeıdi.

«Áskerı múlikti Qyrǵyzstanǵa berý Qazaqstannyń jaýyngerlik ázirligi men qoǵanys qabiletine yqpal etpeıtinin atap ótý qajet», - dedi R. Shpekbaev.