Qazaqstan Qyrǵyzstanǵa gaz jetkizetin bolady - K.Másimov
ShKEK. 16 qyrkúıek. QazAqparat /Arnur Rahymbekov/ - Búgin Bishkekte Qazaqstan Premer-Mınıstri Kárim Másimov pen Qyrǵyzstan Úkimet basshysy Almazbek Atambaevtyń qatysýymen Qazaqstan Respýblıkasy men Qyrǵyz Respýblıkasynyń Úkimetaralyq keńesi bolyp ótti.
Birlesken qorytyndy brıfıng kezinde K.Másimov habarlaǵandaı, kelissózder nátıjesinde energetıka men aýylsharýashylyǵy salasynda birtalaı mańyzdy kelisimderge qol jetkizildi. Naqtyraq aıtar bolsaq, taraptar Qyrǵyzstannan Qazaqstanǵa qosymsha elektr energııasyn satyp alý týraly kelisti. Qyrǵyz energııasy Qazaqstannyń qarqyndy damyp kele jatqan ındýstrııasyna qosymsha múmkindikter beredi. Aýyl sharýashylyǵy salasynda Qazaqstannyń ońtústik aımaqtaryna sýdy jetkizý boıynsha sý máseleleri sheshildi.
«Bul bizdiń Jambyl, Qyzylorda jáne Ońtústik Qazaqstan oblystary úshin mańyzdy, jáne ol Qyrǵyzstan ekonomıkasyna da paıdaly», - dedi K.Másimov.
Kelisimderdiń mańyzdylarynyń biri qazaqstandyq gazdy Qyrǵyzstanǵa jetkizýge qatysty boldy. «Qyrǵyzstanda qazaqstandyq gaz ben jylý bolady, jáne muny taıaý ýaqytta ár qyrǵyzstandyq sezine alady. Qazirgi ýaqytta sharýashylyq sýbektiler tehnıkalyq kelissózderdi jalǵastyrady. Qazaqstandyq taraptan otynnyń jetkizýshisi otandyq «QazMunaıGaz» operatory bolady», - dep qosty QR Premer-Mınıstri.
Sonymen qatar taraptar birlesken ınvestıtsııalyq qor qurý týraly da kelisti. QR Premer-Mınıstriniń aıtýynsha, taıaý ýaqytta Bishkekte ofısiniń ashylýy bolady.
