Qazaqstan Qyrǵyzstanǵa áskerı-tehnıkalyq kómek kórsetetin boldy

NUR-SULTAN. QazAqparat - Qazaqstan men Qyrǵyzstan qorǵanys mınıstrleri áskerı yntymaqtastyq týraly qujattarǵa qol qoıdy, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Qazaqstannyń Qorǵanys mınıstri general-leıtenant Nurlan Ermekbaev Qyrǵyzstan Prezıdentiniń resmı sapary aıasynda kelgen qyrǵyz áriptesi general-maıor Talaıbek Ómirálıevpen kezdesti.

Taraptar áskerı yntymaqtastyqtyń, óńirlik qaýipsizdiktiń, UQShU, TMD, ShYU sheńberindegi kópjaqty ózara is-qımyldyń ózekti máseleleri jóninde pikir almasty.

Nurlan Ermekbaev pen Talaıbek Ómirálıev Qyrǵyzstanǵa áskerı-tehnıkalyq kómek kórsetý, sondaı-aq 20212 jylǵa arnalǵan áskerı yntymaqtastyq jospary týraly kelisimge qol qoıdy.

«Búgingi kezdesý barysynda qol jetkizilgen ýaǵdalastyqtar qorǵanys salasyndaǵy budan ári tájirıbelik ózara is-qımylǵa negiz bolady dep senemin», - dep Qazaqstan qorǵanys vedomstvosynyń basshysy atap ótti.

Kezdesý barysynda eki eldiń Qarýly Kúshteri bólimsheleriniń jaýyngerlik daıyndyǵy, sonyń ishinde osy jyly Qazaqstan aýmaǵynda «Ańyraqaı» birlesken oqý-jattyǵýyn ótkizý, bıylǵy Armııa halyqaralyq oıyndarynyń saıystaryna qatysý, arnaıy operatsııalar kúshterin daıarlaý is-sharalary, sondaı-aq áskerı bilim sheńberinde ári qaraı ózara is-qımyl máseleleri talqylandy.

Aıta keteıik, Qyrǵyzstan Prezıdenti Sadyr Japarov Qazaqstanǵa memlekettik saparmen kelgen bolatyn.

Osy sapar aıasynda Qyrǵyzstan basshysy Qazaqstan Prezıdenti Qasym-Jomart Toqaevpen shaǵyn jáne keńeıtilgen quramda kelissózder júrgizdi.

Sondaı-aq eki eldiń basshylary kelissózderdiń qorytyndysy boıynsha birqatar qujatqa qol qoıdy.