Qazaqstan Qyrǵyzstanǵa áskerı-tehnıkalyq kómek kórsetedi
Buǵan deıin Májilis «Qazaqstan Respýblıkasynyń Úkimeti men Qyrǵyz Respýblıkasynyń Mınıstrler Kabıneti arasyndaǵy Ortalyq Azııa óńiriniń qaýipsizdigin qamtamasyz etýde áskerı-tehnıkalyq járdem kórsetý kelisimin ratıfıkatsııalaý týraly» zań jobasyn maquldaǵan edi.
«Kelisimge 2021 jylǵy 7 jeltoqsanda Joǵarǵy Bas Qolbasshynyń tapsyrmasymen Qyrǵyzstan tarapynan áskerı-tehnıkalyq kómek kórsetý týraly suraýyn iske asyrý maqsatynda qol qoıyldy. Kelisim boıynsha áskerı múlik bir márte beriledi. Onyń ataýy men kólemi dıplomatııalyq arna arqyly kelisildi. Qazaqstan tarapy múlikti Qyrǵyzstannyń Qoıtash eldimekenine deıin avtokólikpen jetkizedi. Shyǵyndy ózi kóteredi. Qyrǵyzstan tarapy alǵan múlikti tek qaýipsizdikti qamtamasyz etý úshin paıdalana alady, úshinshi tarapqa bermeıdi. TMD qatysýshy memleketterge qarsy qoldanbaıdy. Ortalyq Azııaǵa irgeles aýmaqta shıelenis bolǵanda, óńirlik qaýipsizdikke syn-qater tóngen jaǵdaıda áskerı-tehnıkalyq kómek kórsetý Qyrǵyzstan qarýly kúshteriniń oǵan toıbarys berýine, Ortalyq Azııa óńiriniń qaýipsizdigin nyǵaıtýǵa múmkindik beredi», - dedi QR Qorǵanys mınıstriniń orynbasary Sultan Qamaletdınov Senat otyrysynda.
Onyń aıtýynsha, áskerı múlik tizimi anyqtaldy, ol dıplomatııalyq arna arqyly kelisildi.
Onyń ishinde qarý-jaraq, oq-dári, baqylaý jáne barlaý jabdyqtary bar.
«Qazirgi ýaqytta áskerı-tehnıkalyq kómekten basqa jaýyngerlik daıarlyq pen kadr daıarlaý jumystary júrip jatyr. Búginge deıin Qyrǵyzstannyń 300-den astam áskerı qyzmetshileri Qazaqstanda bilim alǵan. Qazir 25 áskerı qyzmetshiler – 2 ofıtser jáne 23 kýrsant oqýdan ótip jatyr. Oǵan qosa, ekijaqty jáne kópjaqty, UQShU, TMD, ShYU oqý-jattyǵýlary men basqa da sharalar ótkiziledi», - dedi S. Qamaletdınov.
Senat depýtaty Nurjan Nursıpatov UQShU jaýapkershilik aımaǵyna shekaralas Aýǵanstandaǵy saıası ahýaldyń shıelenisýine, sondaı-aq óńirlik qaýipsizdikke tónetin syn-tegeýrin men qaterlerdiń ósýine baılanysty Ortalyq Azııanyń qaýipsizdigi men qorǵanysyn qamtamasyz etý kózdelgenin aıtty.
«Áskerı-tehnıkńalyq kómek Qyrǵyzstannyń qarýly kúshteriniń osy qaterlerge toıtarys berýdegi áleýetin kúsheıtýge múmkindik beredi. Qyrǵyzstannyń Qazaqstannyń qaýipsizdigi úshin erekshe geosaıası mártebesin, ortaq shekarasyn, baýyrlas eki memleket arasyndaǵy dostyq qatynastaryn eskere otyryp, zań jobasyn qabyldaý – elimizdiń ulttyq jáne halyqaralyq qaýipsizdigin qamtamasyz etýdegi negizdigili men ózektiligine yqpal etedi», - dedi Nurjan Nursıpatov.
