Qazaqstan Qyrǵyzstanǵa 1 myń avtobýs eksporttaıdy

NUR-SULTAN. QazAqparat - Búgin Úkimet úıinde QR Premer-Mınıstri Asqar Mamın men Qyrǵyz Respýblıkasy Mınıstrler kabınetiniń Tóraǵasy – Prezıdenti Ákimshiliginiń basshysy Aqylbek Japarovpen kezdesti. Kezdesýde Qyrǵyzstannyń Qazaqstanda shyǵarylǵan avtokólik quraldaryn satyp alýy týraly memorandýmǵa qol qoıyldy. Bul týraly QazAqparat primeminister.kz saıtyna silteme jasap habarlaıdy.

Qujatqa Qazaqstan Respýblıkasynyń saýda jáne ıntegratsııa mınıstri Baqyt Sultanov, Qyrǵyz Respýblıkasynyń ekonomıka jáne kommertsııa mınıstri Danııar Amangeldıev, Bishkek qalasynyń meri Aıbek Djýnýshalıev jáne «Allıýr» kompanııalar toby» AQ dırektorlar keńesiniń tóraǵasy Andreı Lavrentev qol qoıdy.

Memorandým 2022 jyly Qyrǵyzstanǵa lızıng shartymen Qazaqstanda shyǵarylǵan Yutong markaly 1 myń birlik elektrli, gaz jáne dızelmen júretin avtobýstardy jáne 100 birlik arnaıy tehnıkany jetkizýdi kózdeıdi.

Bul rette avtobýstar jolaýshylar kóligi qozǵalysyn dıspetcherlendirýdiń elektrondyq júıesimen jáne ONAY PAY jol aqysyn tóleýdiń avtomatty júıesimen jaraqtandyrylady.