Qazaqstan Qyrǵyzstan ekonomıkasyna 1 mlrd dollardan astam qarjy saldy
«Qazaq-qyrǵyz qatynastarynyń mańyzdy basymdyǵy retinde ortaq shekaranyń bolýyn, retke keltirilgen kóliktik ınfraqurylymdy jáne EAEO-daǵy seriktestikti atap ótken jón. Osynyń arqasynda, Qazaqstan Qyrǵyzstannyń aldyńǵy qatarly saýda seriktesteriniń birine aınaldy», - dedi Memleket basshysy Joǵary memleketaralyq keńestiń besinshi otyrysynda.
Sonymen qatar, Qasym-Jomart Toqaev búginde Qyrǵyzstan Qazaqstannyń Ortalyq Azııadaǵy eń iri saýda seriktesteriniń biri ekenin atap ótti.
«Bizdiń taýar aınalym úshinshi jyl qatarynan turaqty ósimdi baıqatyp otyr. 2015 jyldan 2018 jyl aralyǵynda ózara saýda kólemi 30 paıyzǵa ósip, 900 mln dollardy qurady. Qazaqstan eń iri ınvestorlardyń biri bolyp otyr, ıaǵnı qyrǵyz ekonomıkasyna 1 mlrd dollardan astam qarjy saldy», - dedi QR Prezıdenti.
Memleket basshysynyń aıtýynsha, Qyrǵyzstanda qazaqstandyq kapıtaldyń qatysýymen 2 myńǵa jýyq kásiporyn jumys istep jatyr.
«Qazaq ınvestorlary taý-ken, qaıta óńdeý, qurylys, saýda, bank sektorynda, telekommýnıkatsııa salasynda qamtylǵan. Olar Qyrǵyzstannyń áleýmettik ómirine belsendi qatysyp, jumys oryndaryn qurýda, sondaı-aq qarjy men tehnologııanyń tartylýyn yntalandyryp keledi. Sondyqtan Qyrǵyzstan Úkimeti aldaǵy ýaqytta da qoldaý bildirip, qazaq ınvestorlarynyń qyzmetine qolaıly jaǵdaı jasaýdy jalǵastyrady dep úmittenemiz», - dedi Qasym-Jomart Toqaev.
Prezıdenttiń sózine qaraǵanda, búginde Qazaqstanda qyrǵyz kásipkerleriniń qatysýymen 1 myńnan astam kásiporyn jumys istep jatyr.
«Baýyrlastyq rýhynda shekaralas óńirlerde yntymaqtastyq damyp keledi. Olardyń úlesine ekijaqty taýar aınalymynyń 50 paıyzy tıesili jáne bul kórsetkish turaqty ósip keledi. Osy jetistikterdiń barlyǵy bizdiń memleketter arasyndaǵy yntymaqtastyqtyń erekshe mártebesin taǵy da dáleldep otyr», - dedi Memleket basshysy.
