Qazaqstan-Qyrǵyzstan arasyndaǵy beketterden jylyna 11 mln adam ótedi
NUR-SULTAN. QazAqparat – Parlament Senatynyń jalpy otyrysynda «2003 jylǵy 25 jeltoqsandaǵy Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy Memlekettik shekara arqyly ótkizý pýnktteri týraly kelisimge ózgerister engizý týraly hattamany ratıfıkatsııalaý týraly» Zańy qabyldandy, dep habarlaıdy QazAqparat tilshisi.
Hattamada Sarytóbe jáne Aýhatty avtomobıl ótkizý pýnkteriniń mártebesin ekijaqtydan «kópjaqty halyqaralyqqa» aýystyrý eskerilgen. Sonymen qatar, «Novovoskresenovka» ótkizý beketiniń ataýyn «Sypataı batyr» dep ózgertý kózdelgen.
«Qazirgi kezde eki el arasynda 11 avtomobıl ótkizý beketi bar, olardyń beseýi kópjaqty halyqaralyq, al altaýy - ekijaqty. Ekijaqty ótkizý beketteriniń tórteýinen ótetin adamdar men kólik quraldarynyń qarqyny tómen bolýy sebepti olar 2010 jyly jabylǵan. Qazirgi kezde jumys istep turǵan barlyq ótkizý beketinen jylyna 11 mıllıondaı adam, 1 mln 300 myńdaı jeńil kólik, 400 myńnan astam júk kólik quraly ótedi.
Sondaı-aq, 2018 jyly avtomobıl kóligimen júk tasymaldaý Qazaqstan men Qyrǵyzstan arasynda 48 paıyzǵa artyp, 1,7 mln tonnany qurady», - dedi Indýstrııa jáne ınfraqurylymdyq damý mınıstri Beıbit Atamqulov.
Onyń sózine qaraǵanda, eki el arasynda adamdar men kólik quraly eń kóp ótetin beket Qordaı bolǵandyqtan, alǵashqy kzeńde ony jańartýǵa baǵyttalǵan jumystar júrgizilýde jáne qurlysty bastaý 2020 jyldyń naýryz aıyna josparlanǵan. Sol sebepti Sarytóbe jáne Aýhatty avtomobıl beketterin kópjaqty halyqaralyq mártebesine aýystyrý: birinshiden, Qordaı ótkizý beketi jóndeý jumysyna jabylǵanda, ótkinshiler aǵyny atalǵan eki beketti paıdalanady. Ekinshiden, úshinshi elderdiń júk kólikteri osy beketter arqyly ótýge múmkindik ala otyryp, elimizdiń tranzıttik áleýetin odan ári jaqsartýǵa yqpal etedi.
