Qazaqstan-qyrǵyz shekarasy arqyly Ystyqkól kýrorttyq aımaǵyna qaraı ótkizýdi qosymsha úsh beket júzege asyra bastady

QR Týrızm jáne sport mınıstrliginen habarlaǵandaı, qazaq-qyrǵyz shekarasy arqyly Ystyqkól kýrorttyq aımaǵyna qaraı bet alǵan týrıstik toptardyń deni «Qarasý» ótkizý beketi arqyly ótedi. Bul ýchaskemen kúndelikti saǵat 23.00-den tańerteńgi 5-ke deıin bir baǵytta orta eseppen 40-qa jýyq avtobýs ótetin kórinedi. Osy oraıda, eki el shekarasynda ornalasqan «Aýqatty» jáne «Sartóbe» ótkizý beketterinde keden termınaldary paıdalanýǵa engizildi.

«Qarasý» ótkizý beketinde adamdar men kólikterdiń jınalýyn boldyrmaý úshin, Ystyqkól kóline qaraı Memlekettik shekaradan - «Aýqatty», «Sartóbe» (eki baǵytty) jáne «Qordaı» (kóp baǵytty) ótkizý beketteri arqyly ótýge bolatyny týraly týrıstik kompanııalardy habardar etemiz»,- delingen habarlamada.

Mınıstrlikten málim etkendeı, qosymsha qyzmetter júktelgen beketterdiń tehnıkalyq jaraqtandyrylýy «Qarasý» beketine qaraǵanda áldeqaıda jaqsy.