Qazaqstan Qyrǵyz eline eki mektep salyp beretin bolady - Senat
ASTANA. 26 jeltoqsan. QazAqparat - Búgin QR Parlamenti Senatynyń jalpy otyrysynda palata depýtattary «Qazaqstan men Qyrǵyzstan Úkimetteri arasyndaǵy Qyrǵyz Respýblıkasynda mektep salý týraly kelisimdi jáne Kelisimge ózgerister engizý týraly hattamany ratıfıkatsııalaý týraly zańy qabyldandy.
Atalǵan hattamaǵa 2013 jylǵy 11 sáýirde Astana qalasynda qol qoıylǵan. Zań jobasynyń maqsaty Osh oblysynda myń oryndyq mektep salý jáne oǵan irgeles jatqan aýmaqty abattandyrý bolyp tabylady. Hattamamen osy kelisimge mekteptiń sanyn ekige deıin kóbeıtý bóligine ózgeris engizilip otyr. Atap aıtqanda, Bishkek qalasynda 500 oryndyq jáne Osh qalasynda 500 oryndyq mektep salý jáne mańaıyndaǵy aýmaqty abattandyrý kózdelip otyr. Bul rette Qyrǵyz tarapy nysandardy salý úshin Bishkek qalasynda 2, 49 gektar kóleminde jáne Osh qalasynda 2,5 gektar kóleminde Qyrǵyz Respýblıkasynyń zańnamasyna sáıkes qandaı da bir mindettemelerden bosatylǵan jer ýchaskelerin usynatyn bolady. Mektepterdi salý «Samuryq-Qazyna» qory bóletin, jalpy mólsheri 1 mlrd. 200 mln. 800 myń teńge qarajat esebinen júzege asatyn bolady.
Jalpy, Parlament qabyldaǵan Zańnyń maqsaty eki memlekettiń tatý kórshilik jáne dostyq baılanystaryn nyǵaıtýdy qarastyratyn kórsetilgen qujattardy ratıfıkatsııalaý, sondaı-aq Qazaqstan Respýblıkasynyń Qyrǵyz Respýblıkasyna qoldaý kórsetýi bolyp tabylady.
