Qazaqstan qyrǵyz elimen jaqsy kórshi bolýǵa múddeli - Elbasy

ASTANA. QazAqparat - Qyrǵyz halqymen dostyq kórshilik baılanystardy nyǵaıtýǵa múddelimiz. Otandyq BAQ ókilderine suhbat bergen Qazaqstan Prezıdenti Nursultan Nazarbaev osylaı málim etti, dep habarlaıdy QazAqparat.

«Bizdiń baǵytymyz belgili. Qyrǵyz eli, halqy bizge óte jaqyn. Til, mádenıet, ádet-ǵuryp jaǵynan da baıaǵydan beri kele jatqan jaqyndyǵymyz bar. Zııaly qaýymnyń, jazýshylardyń, aqyndardyń, jastardyń, ıaǵnı barsha halyqtyń ózara baılanystary ornaǵan. Sondyqtan Qazaqstan qyrǵyz elimen qoıan-qoltyq aralasyp, jaqsy kórshi bolýǵa múddeli», - dep atap ótti Memleket basshysy.

Osy oraıda Elbasy qarapaıym halyqtyń ómirin qıyndatpaı, eki eldiń qarym-qatynasyn damytyp, saýda-sattyq pen ózara baılanystardy nyǵaıtý qajettigin qadap aıtty.

Aıta keterligi, búgin Aqordada Memleket basshysy Nursultan Nazarbaev pen Qyrǵyzstan Prezıdenti Sooronbaı Jeenbekov kezdesti . 

Eske sala ketsek, 22 jeltoqsan kúni Elbasy Nursultan Nazarbaev elimizdegi jetekshi BAQ ókilderine 2017 jyldy qorytyndylaýǵa arnalǵan suhbat berdi. Onda qazaq qoǵamyndaǵy eleýli ózgerister men ózekti máseleler týraly jýrnalıster suraǵyna jaýap berdi. Atalmysh suhbattyń televızııalyq nusqasy búgin respýblıka telearnalardyń efırinen kórsetildi.