Qazaqstan Qyrǵyz elimen shekaradaǵy baqylaýdy halyqaralyq mindettemelerge saı júzege asyrýda - sarapshy
Bul jaıynda «Atameken» Ulttyq kásipkerler palatasy Agroónerkásip kesheni jáne tamaq ónerkásibi departamentiniń dırektory Erbol Eseneev aıtty, dep habarlaıdy QazAqparat.
«Qazaqstan Alımentarıýs kodeksi komıssııasynyń, Halyqaralyq epızootıkalyq bıýronyń jáne Halyqaralyq karantın jáne ósimdikti qorǵaý konventsııasynyń múshesi bola otyryp, qoldanystaǵy quqyqtyq qujattaryn halyqaralyq standarttarmen belsendi úılestiredi jáne halyqaralyq standarttar ázirleý isine de belsene qatysýda. Biz ózimizdiń moınymyzǵa alǵan mindettemelerdiń barlyq jaýapkershiligin túsinemiz jáne sol sebepti eldiń osynaý joǵary mártebesine saı bolýǵa tıispiz», - dedi Erbol Eseneev.
Osy rette ol Eýrazııalyq ekonomıkalyq odaq týraly shartqa sáıkes birlestikke múshe barlyq memleketterge úshinshi elderdiń taýarlaryna, sonymen qatar EAEO-ǵa múshe ózge memleketter óndiretin taýarlarǵa qatysty ýaqytsha sanıtarlyq, fıtosanıtarlyq jáne veterınarlyq sharalardyń engizilýine ruqsat etiletindigin atap ótti.
«Qazaqstan EAEO-men elimizdiń veterınarlyq-sanıtarlyq talaptaryna sáıkes kelmeıtin ónimderdi engizýge, qoldanýǵa jáne satýǵa ýaqytsha shekteý engizý arqyly joǵaryda atalǵan quqyǵyn paıdalanyp otyr. Bul bizdiń bárimizge de ortaq qaýipsizdik sharasy ekendigin túsinýimiz qajet», - dedi sarapshy. Onyń aıtýynsha, Qyrǵyzstanda Halyqaralyq epızootıkalyq bıýronyń aýsyldan azat aımaq retinde bergen mártebesi joq. Sondyqtan da Qazaqstan kórshi elden keletin mal sharýashylyǵy ónimderine kúdikpen qaraýǵa májbúr. Óıtkeni Qazaqstan da bul mártebeni osydan biraz ýaqyt buryn alǵan edi.
«Qazaqstandyq agrobıznes úshin bul - jańa mártebe, jańa múmkinshilikter. Onyń ishinde QHR men Iranǵa qoı etin eksporttaýǵa múmkinshilik ashady. Aıta keterligi, qazaqstandyq tabıǵı et sheteldik tutynýshylar arasynda zor suranysqa ıe», - deıdi departament dırektory.
Onyń dereginshe, kórshi elden jetkiziletin ónimderden zııankesterdiń tabylýy jıi kezdesip otyrady. Máselen, Qyrǵyzstannan ákelingen kartoptan sarǵylt tústi kartop nematody (qurty) tabyldy. Al bul qurt topyraqtyń jappaı zaqymdanýyna jáne kartop ónimdiliginiń 90 paıyzǵa deıin kemýine ákep soǵady. Munan bólek, zııankester Qyrǵyz elinen jetkizilgen ózge de jemis-jıdek pen kókónisten tabylyp otyr.
