Qazaqstan «Qyrǵı qabaq soǵystyń» burynǵy oshaǵyn úmittiń sımvolyna aınaldyrdy – Pan Gı Mýn
«Aldymen barlyq qatysýshylardy Qazaqstan Respýblıkasy Táýelsizdiginiń 30 jyldyǵymen shyn júrekten quttyqtaýǵa ruqsat etińizder. Qazaqstan men Ortalyq Azııa aımaǵynyń dosy retinde Qazaqstannyń sońǵy 30 jylda qanshalyqty alǵa basqany jóninde oı júgirtý men úshin kóńil súısinterlik jaıt. Barshańyzǵa belgili, óz elimniń otarshyldyqtan soǵysqa, al demokratııa úshin kúresten ekonomıkalyq ósý men turaqtylyqqa qalaı jetkeniniń kýásimin. Kedeıshilikti, soǵysty, ósý men ornyqtylyqty óz kózimmen kórgen men úshin Qazaqstannyń tabysty ósýge, turaqtylyqqa jáne aımaqtaǵy kóshbasshy bolýǵa aparatyn óz joly men traektorııasynyń kýási bolý zor maqtanysh», - dedi saıasatker.
Sondaı-aq BUU burynǵy Bas hatshysy óziniń týǵan eli Koreıa Respýblıkasy men Qazaqstannyń yntymaqtastyǵy bekı túsýine tilektes ekenin bildirdi.
«Men bul tabysqa negizinen Qazaqstannyń Tuńǵysh Prezıdenti joǵary mártebeli Nursultan Nazarbaev pen Qazaqstan basshylyǵynyń arqasynda qol jetkizildi dep sanaımyn. Olar «Qyrǵı qabaq soǵystyń» burynǵy oshaǵyn úmittiń, halyqaralyq yntymaqtastyq pen ıadrolyq qarýdan aza aýmaqtyń sımvolyna aınaldyrdy. Qazaqstannyń táýelsizdiginiń alǵash moıyndaǵan elderdiń biri Koreıa men Qazaqstan arasyndaǵy tyǵyz ekijaqty qarym-qatynastar týraly árqashan erekshe yqylaspen oılaıtyn bolam. Qazaqstannyń aımaqtyq kóshbasshy retinde órkendeýi jalǵasyp otyrǵandyqtan, aımaqtyq turaqtylyqty saqtaýǵa, Koreıamen qarym-qatynasyn nyǵaıtýǵa jáne 2030 jylǵa deıingi ornyqty damýǵa baǵyttalǵan barlyq ıgi umtylystarynda Qazaqtannyń tabysqa jetýine tilektespin. Biz COVID-19 pandemııasy bastalýynyń eki jyldyq mejesine birtindep jaqyndaǵan saıyn Qazaqstan halqyna zor densaýlyq pen tabys tileımin. Aldaǵy 30 jyl ishinde jáne odan keıingi kezeńde beıbitshilik pen órkendeýdi tileımin», - dedi Pan Gı Mýn.
