Qazaqstan qylmystyq jazasyn ótep shyqqandardy jumyspen qamtýǵa múddelilik tanytyp otyr - halyqaralyq sarapshy pikiri
ASTANA. Sáýirdiń 7-si. QazAqparat /Aıdar Ospanalıev/ - Qazaqstan túrmede otyrǵandardyń sany jaǵynan álemde 17-shi orynda. Sońǵy 10 jyl ishinde memleket bul kórsetkishte 3 orynǵa tómendegen. London ýnıversıtetiniń álem elderiniń penıtentsıaryq júıesin zerteýmen aınalysatyn túrmeler jónindegi halyqaralyq zertteý ortalyǵynyń málimetteri osyndaı.
Bul málimettermen búgin buqaralyq aqparat quraldarynyń ókilderimen eldegi qylmystyq-atqarý júıesiniń qyzmetine baılanysty baspasóz máslıhatyn ótkizgen Ádilet mınıstrliginiń resmı ókili Erbolat Erimbet tanystyrdy, dep habarlaıdy QazAqparat.
Onyń sózine qaaǵanda, búginde eldegi qylmystyq-atqarý júıesiniń ashyqtyǵyn qamtamasyz etý men osy salada qoǵamdyq baqylaýdy ornatý maqsatynda memlekettik organdar tarapynan Birikken Ulttar Uıymynyń Azaptaýǵa qarsy komıtetiniń usynystaryn júzege asyrý sharalary oryndalýda. «Al bıylǵy jyldyń aqpan aıynyń 7-si men 11-i aralyǵynda Ulybrıtanııanyń túrmeler jónindegi halyqaralyq sarapshysy Djonatan Aıtken Astana, Kókshetaý, Stepnogor qalalaryndaǵy túzeý oryndarynda bolyp qaıtty. Sarapshy ondaǵy sottalǵandardyń jaǵdaılarynyń qanaǵattanarlyqtaı ekendigin aıtty. Onyń arnaıy saraptaýynan ótken kóptegen memleketterdiń túrmelerindegi jaǵdaımen salystyrǵanda Qazaqstandaǵy túrmelerdegi sanıtarlyq jaǵdaı talapqa saı. Sarapshy atap ótken eń basty másele - bizdegi túrmelerde otyrǵandarǵa týǵandarymen kezdesip, olarmen uzaǵyraq bolýlaryna jaǵdaı jasalǵan jáne túrme ákimshiligi jazasyn ótep shyqqandardy jumyspen qamtý úshin qol ushyn sozýǵa múddeli», dedi resmı ókil.
