Qazaqstan KVI-di emdeý úshin dári-dármektiń 59 túrin satyp aldy
«COVID-19 patsıentterine statsıonarlyq kómek kórsetý qurylymy ózgertilip jatyr. 13 myń tósek orny bar karantındik statsıonarlar provızorlyq jáne ınfektsııalyq emhana bolyp jasaqtalýda. Memleket basshysynyń tapsyrmasymen tósek oryndardyń sany 50 myńǵa kóbeıtiledi. Keıingi úsh kúnniń ishinde koronavırýs juqtyrǵan azamattar úshin qosymsha 1,5 myń tósek orny jasaqtaldy. Al KVI juqtyrǵany jóninde kúdigi bar azamattarǵa 5 myń provızorlyq tósek orny ázirlendi», - dedi Alekseı Tsoı búgin OKQ-da ótken baspasóz máslıhatynda.
Onyń aıtýynsha, búgingi tańda 333 medıtsınalyq uıymda 20 myń ınfektsııalyq tósek-oryn bar. Onyń kóbine pnevmonııamen túskender jatqyzylýda.
«Ókpeni jasandy jeldetýdiń 3 myńǵa tarta apparaty bar statsıonarlarda qosymsha 987 apparat satylyp alynady. Sonymen birge osyndaı apparattyń taǵy 1 myńyn satyp alý kózdelýde. Odan bólek oksıgeno-terapııamen turaqty túrde qamtý úshin 4 myń ottegi kontsentratoryn satyp alý josparlanǵan. Jalpy koronavırýs ınfektsııasy boıynsha naýqastardy tolyǵymen qamtý úshin statsıonarlarda quny 138,8 mln teńgege 59 dári-dármek túri satyp alyndy. 2 shildedegi jaǵdaı boıynsha óńirlerdegi medıtsınalyq uıymdar 27 myń naýqasqa arnalǵan vırýsqa qarsy preparattarmen qamtylǵan. Odan bólek 15 shildege deıin taǵy 28 myń naýqasqa arnalǵan dári-dármekti ákelý kózdelýde», - dedi ol.
Eske sala ketsek búgin QR Premer-Mınıstri Asqar Mamınniń tóraǵalyǵymen ótken Memlekettik komıssııa otyrysynda QR Prezıdenti Qasym-Jomart Toqaevtyń tapsyrmasyna sáıkes Qazaqstandaǵy epıdemıologııalyq ahýaldy turaqtandyrý sharalary qaralǵan bolatyn. Memlekettik komıssııanyń sheshimimen 5 shildeden bastap elimizde 14 kúnge qatań shekteý sharalary engiziletin boldy.
