Qazaqstan kvazımemlekettik sektor oblıgatsııalaryna salyq salý tásilin ózgertpek
ASTANA. KAZINFORM – Qazaqstanda qor bırjasynan tys jasalatyn kvazımemlekettik sektor oblıgatsııalarymen operatsııalarǵa salyq salýdyń biryńǵaı tásilin engizý usynysy qoldaý tapty, dep habarlaıdy Úkimettiń baspasóz qyzmeti.
Bul másele Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen ótken Salyq kodeksin engizý jónindegi jobalyq keńseniń 27-otyrysynda qaraldy.
Qazirgi ýaqytta Euroclear/Clearstream halyqaralyq depozıtarlyq júıeleri arqyly sheteldik ınvestorlardyń Qazaqstannyń kvazımemlekettik sektor oblıgatsııalaryna qoljetimdiligin keńeıtý múmkindigi pysyqtalyp jatyr. Mundaı baǵaly qaǵazdardyń negizgi ustaýshylary beırezıdentter bolady dep boljanyp otyr.
Alaıda qoldanystaǵy salyq zańnamasynda Qazaqstan qor bırjasynda satyp alynǵan baǵaly qaǵazdar keıin bırjadan tys satylǵan jaǵdaıda olardyń qunynyń ósýinen túsetin tabysqa salyq salý máselesi tolyq rettelmegen.
Ulttyq bank tóraǵasynyń orynbasary Álııa Moldabekovanyń aıtýynsha, beırezıdent Qazaqstan qor bırjasynda kvazımemlekettik sektor oblıgatsııalaryn satqan jaǵdaıda olardyń qunynyń ósýinen túsken tabys salyqtan bosatylady.
– Alaıda osy baǵaly qaǵazdardy keıinnen Qazaqstan qor bırjasynan tys satý kezinde zańnamada dál osyndaı tásil qarastyrylmaǵan, – dedi Álııa Moldabekova.
Bul másele halyqaralyq depozıtarlyq ınfraqurylym arqyly júrgiziletin operatsııalar kóleminiń artýyna baılanysty ózekti bolyp otyr.
Euroclear/Clearstream júıelerindegi beırezıdentter arasyndaǵy mámileler qazaqstandyq saýda jáne esep aıyrysý ınfraqurylymy arqyly ótpeıdi. Al beırezıdentter men qazaqstandyq naryq qatysýshylary arasynda bırjadan tys, ıaǵnı OTC mámileleri jasalǵan kezde qor bırjalary arqyly uıymdastyrylǵan naryqtaǵy operatsııalarǵa beriletin salyqtyq jeńildik qoldanylmaıdy.
Qazirgi ýaqytta kvazımemlekettik sektor sýbektileriniń aınalystaǵy teńgelik oblıgatsııalarynyń kólemi shamamen 17,6 trln teńgeni quraıdy.
2026 jyldyń segiz aıyndaǵy memlekettik baǵaly qaǵazdar kólemindegi beırezıdentterdiń ortasha úlesi 8,1% bolǵanyn eskersek, olardyń kvazımemlekettik sektor oblıgatsııalaryna salymdarynyń áleýetti kólemi shamamen 1,4 trln teńgege jetýi múmkin.
Osylaısha, bırjalyq jáne bırjadan tys operatsııalarǵa qoldanylatyn salyq rejımderiniń aıyrmashylyǵy sheteldik ınvestorlar úshin qosymsha kedergi týǵyzyp, halyqaralyq depozıtarlyq ınfraqurylym arqyly kvazımemlekettik sektor oblıgatsııalarynyń aınalym áleýetin shekteýi yqtımal.
Talqylaý qorytyndysynda jobalyq keńes músheleri Qazaqstan qor bırjasynan tys jasalatyn tıisti mámileler kezinde baǵaly qaǵazdar qunynyń ósýinen túsetin tabysty salyqtan bosatý tásilin jalpy qoldady.
Ulttyq ekonomıka mınıstrligi Qarjy mınıstrligimen birlesip salyq zańnamasyna qajetti naqtylaýlardy pysyqtaıdy. Jumys nátıjeleri týraly naryq qatysýshylaryna qosymsha aqparat beriledi.
Aıta keteıik, jerasty sýyn paıdalanatyn sharýalarǵa salyq azaıýy múmkin.
