Qazaqstan Kýveıttiń jańa agroaımaǵynyń óndiristik bazasyna aınalýy múmkin
ASTANA.KAZINFORM — Qazaqstan Kýveıttiń jańa agroónerkásiptik arnaıy ekonomıkalyq aımaǵy úshin óndiristik baza bolýdy usyndy, dep habarlaıdy QR SІM baspasóz qyzmeti.
Qazaqstan Respýblıkasynyń Kýveıt memleketindegi elshisi Erjan Elekeev Kýveıt Memleketiniń turaqty damý máseleleri jónindegi memlekettik mınıstri Rım Ál-Fýlaıdjpen kezdesti.
Kezdesý barysynda taraptar azyq-túlik qaýipsizdigi salasyndaǵy qazaqstandyq-kýveıttik yntymaqtastyqty keńeıtý perspektıvalaryn, sondaı-aq agroónerkásiptik keshendegi birlesken ınvestıtsııalyq jobalardy iske asyrý múmkindikterin talqylady.
— Qazaqstan elshisi elimizdiń óńirdegi jetekshi aýyl sharýashylyǵy ónimderin óndirýshilerdiń biri retindegi áleýetin atap ótip, Qazaqstannyń Kýveıttiń azyq-túlik qaýipsizdigin qamtamasyz etýdegi senimdi ári uzaqmerzimdi seriktes bolýǵa daıyn ekenin jetkizdi. Atap aıtqanda, qazaqstandyq bıdaı, sıyr eti, qoı eti, ósimdik maılary jáne basqa da aýyl sharýashylyǵy ónimderin jetkizý múmkindikteri, sondaı-aq Qazaqstan aýmaǵynda zamanaýı óndiristik jáne qaıta óńdeý kásiporyndaryn qurýǵa kýveıttik ınvestıtsııalardy tartý áleýeti tanystyryldy, — delingen habarlamada.
Kýveıttiń aýyl sharýashylyǵy ónimderin óńdeýge baǵyttalǵan mamandandyrylǵan arnaıy ekonomıkalyq aımaq qurý josparlaryna erekshe nazar aýdaryldy. Osyǵan baılanysty qazaqstandyq tarap Qazaqstannyń Kýveıttiń bolashaq qaıta óńdeý kásiporyndaryn shıkizatpen jáne daıyn ónimmen qamtamasyz etetin senimdi óndiristik baza retinde qarastyrylýyn usyndy.
Sondaı-aq taraptar salynyp jatqan «Gulf Railway» óńirlik temirjol jelisin Qazaqstan aýmaǵy arqyly ótetin halyqaralyq kólik dálizderimen, eń aldymen «Soltústik-Ońtústik» halyqaralyq kólik dálizimen yqpaldastyrý perspektıvalaryn talqylady. Mundaı baılanys bolashaqta Qazaqstannyń aýyl sharýashylyǵy ónimderin Parsy shyǵanaǵy elderine jetkizýdiń tıimdi logıstıkalyq tizbekterin qalyptastyrýǵa múmkindik beretini atap ótildi.
Óz kezeginde Rım Ál-Fýlaıdj azyq-túlik qaýipsizdigi Kýveıttiń negizgi memlekettik basymdyqtarynyń biri ekenin rastady. Ol Qazaqstanmen yntymaqtastyqty keńeıtýge, onyń ishinde agroónerkásiptik keshenge ınvestıtsııa tartýǵa, birlesken óndiristerdi damytýǵa jáne qazaqstandyq aýyl sharýashylyǵy ónimderiniń Kýveıt naryǵyna uzaq merzimdi jetkizilimderin ulǵaıtýǵa qyzyǵýshylyq bildirdi.
Buǵan deıin Qazaqstan men Kýveıt tsıfrlandyrý salasyndaǵy yntymaqtastyqty kúsheıtýdi josparlap otyrǵanyn jazǵan edik.
