Qazaqstan men Kýveıt tikeleı áýe qatynasyn damytýǵa múddeli
ASTANA. KAZINFORM - Qazaqstan men Kýveıt tikeleı áýe qatynasyn keńeıtý jáne eki el arasyndaǵy jolaýshylar reısteriniń jıiligin arttyrý múmkindikterin talqylady.
Bul másele Qazaqstan Respýblıkasynyń Kýveıt Memleketindegi Elshisi Erjan Elekeev pen Kýveıt Azamattyq avıatsııa bas basqarmasynyń prezıdenti sheıh Hamýd Mýbarak As-Sabahtyń kezdesýinde qaraldy, dep habarlaıdy QR Syrtqy ister mınıstrliginiń baspasóz qyzmeti.
Taraptar azamattyq avıatsııa salasyndaǵy qazaq-kýveıt yntymaqtastyǵyn odan ári damytý jáne eki el arasyndaǵy tikeleı áýe qatynasyn keńeıtý perspektıvalaryn talqylady.
Qazaqstan men Kýveıt arasyndaǵy tikeleı jolaýshylar reısteriniń jıiligin arttyrý múmkindikterine erekshe nazar aýdaryldy. Bul eki memleket arasyndaǵy iskerlik jáne týrıstik baılanystardy odan ári damytýǵa yqpal etetini atap ótildi.
Sondaı-aq qazaqstandyq ónimderdi Kýveıt naryǵyna tasymaldaý múmkindikterin keńeıtýdi jáne Qazaqstan men Kýveıt arasyndaǵy kólik-logıstıkalyq baılanystardy nyǵaıtýdy qosa alǵanda, áýe júk tasymaldaryn damytý perspektıvalary qarastyryldy.
Qazaqstan men Kýveıt arasyndaǵy Áýe qatynasy týraly úkimetaralyq kelisimdi jasasý máselesi jeke qaraldy. Atalǵan kelisimniń jobasy buǵan deıin qazaqstandyq tarappen Kýveıt tarapynyń qaraýyna usynylǵan bolatyn. Osyǵan baılanysty qujatty keıinnen qol qoıý maqsatynda odan ári pysyqtaýdyń mańyzdylyǵy ataldy.
Óz kezeginde sheıh Hamýd As-Sabah Kýveıt tarapynyń Qazaqstanmen azamattyq avıatsııa salasyndaǵy yntymaqtastyqty damytýǵa múddeliligin bildirip, ekijaqty ózara is-qımyldy tereńdetý, áýe qatynasyn keńeıtý jáne birlesken bastamalardy iske asyrý úshin qajetti kúsh-jiger jumsaýǵa daıyn ekenin rastady.
Kezdesý qorytyndysy boıynsha taraptar azamattyq avıatsııa salasyndaǵy yntymaqtastyqty nyǵaıtýǵa jáne Qazaqstan men Kýveıt arasyndaǵy tikeleı áýe qatynasyn odan ári damytýǵa ózara múddeliligin rastady.
Osyǵan deıin Kýveıttiń Qazaqstannyń munaı-gaz jobalaryna kóz tigip otyrǵany týraly jazdyq.
