Qazaqstan qutqarýshylary Aýǵanstandaǵy jer silkingen 76 ýchaskedegi úıindini bólshektedi
Qazaqstan qutqarýshylary Gerat provıntsııasyndaǵy jer silkinisinen keıin úıindilerdi bólshekteý jumystaryn jalǵastyryp jatyr, dep habarlady Kazinform.
Qazaqstan Tótenshe jaǵdaılar mınıstrligi baspasóz qyzmetiniń málimetinshe, izdestirý-qutqarý jumystary Naıbrofı eldi mekeninde júrgizilip jatyr.
Alǵashqy táýlik ishinde 76 ýchaskedegi úıindini bólshektedi. Bul – qıraǵan úılerdiń fragmentteri.
Sonymen qatar Apattar medıtsınasy ortalyǵynyń dárigerleri men feldsherleri 39 jergilikti turǵynǵa, onyń ishinde 5 balaǵa medıtsınalyq kómek kórsetti. Turǵyndar negizinen jaraqattarmen, kúrdeli stress reaktsııasymen júgindi, tipti sýyq tıip syrqattanǵan adamdarǵa da kómek kórsetildi.
Búgin tańǵy saǵat 06.32-de Gerat qalasynyń mańynda kúshti aftershok tirkeldi. Cholktýla eldi mekeninde zardap shekkenderdiń bolýy múmkin ekeni týraly aqparat tústi. Sol jerge 29 qazaqstandyq qutqarýshy jiberildi. Olar ózderine bólingen ýchaskedegi úıindilerdi bólshekteý jumystaryn júrgizdi. Zardap shekkender tabylǵan joq.
10 turǵynǵa medıtsınalyq kómek kórsetildi. Jumys aıaqtalǵannan keıin kúshter men quraldar zardap shekken adamdardy izdeýdi jalǵastyrý úshin Naıbrofı eldi mekenine oraldy.
Esterińizge sala keteıik, 10 qazanda Memleket basshysynyń tapsyrmasy boıynsha 45 adamnan qurylǵan Qazaqstan TJM kúshter men quraldar tobyn Aýǵanstanǵa joıqyn jer silkinisiniń saldaryn joıýǵa kómek kórsetý úshin jiberildi.
