Qazaqstan qus etinen basqa mal sharýashylyǵy ónimderimen ishki naryqty tolyq qamtamasyz etip otyr -A. Mamytbekov
Búgin «Qazaqstan Respýblıkasynda mal sharýashylyǵyn damytýdyń ózekti máseleleri men perspektıvalary» atty taqyrypta ótken Parlamenttik tyńdaýda Aýyl sharýashylyǵy mınıstri Asyljan Mamytbekov osylaı málimdedi.
Mınıstrdiń aıtýynsha, byltyrǵy jyly elimizde sıyr etin óndirý 373,5 myń tonnany, qoı eti -153,8 myń tonnany, shoshqa -192,7 myń tonnany, jylqy eti - 85,1 myń tonnany, qus etin óndirý - 123,1 myń tonnany quraǵan. Al sút óndirisi 4851,6 myń tonnaǵa jetti.
«Statıstıka málimetterine súıensek, 2012 jyly mal sharýashylyǵy salasynda 1 trln. teńgeden astam ónimder óndirildi. 2011 jylmen salystyrǵanda salanyń ósim qarqyny 4 paıyzǵa tómendegen. Sonymen bir mezgilde, mal sharýashalyǵynyń úlesi udaıy ósim ústinde. 2012 jyldyń qorytyndysy boıynsha mal sharýashylyǵy salasyndaǵy óndirilgen ónim ósimdik sharýashylyǵynan basym tústi. Eki saladaǵy óndirilgen ónimder boıynsha mundaı qatynastyq kórsetkishterge táýelsizdik jyldary ishinde alǵash ret qol jetip otyrǵanyn atap ótý kerek», - dedi mınıstr.
