Qazaqstan qurlyqtaǵy Sıngapýr bolady – Shaqqalıev
ASTANA. KAZINFORM – Álemdik saýdadaǵy ózgerister Qazaqstannyń eksporttyq múmkindikterin keńeıtýge yqpal etýi múmkin. Bul týraly Úkimettegi brıfıng barysynda QR Saýda jáne ıntegratsııa mınıstri Arman Shaqqalıev málim etti.
Mınıstrdiń aıtýynsha, qazir álemdik saýdada uzaq merzimdi úrdister, sonyń ishinde protektsıonızm jáne saýda baǵyttarynyń ózgerýi baıqalady. Osy jaǵdaıda Qazaqstan dástúrli eksporttyq ónimderin arttyrýǵa jáne jańa naryqtardy ıgerýge basymdyq berip otyr.
– Shynynda da, jaǵdaı ózgerip jatyr. Biz bul uzaq merzimdi úrdis ekenin aıttyq, saýda keńistikteri qalyptasyp, belgili bir protektsıonızm bolady. Búginde biz agroónerkásiptik keshen ónimderin óńdeý eksporty boıynsha jaqsy kórsetkishterge ıe bolyp otyrmyz. Qazir agroónimder eksportynyń ósý draıverine aınaldy, – dedi Arman Shaqqalıev.
Onyń aıtýynsha, Qazaqstan almastyrýǵa bolatyn birqatar ónim túrleri boıynsha eksport kólemin ulǵaıtý múmkindigine ıe. Atap aıtqanda, Qytaı naryǵyna jemdik un, suly, zyǵyr sııaqty ónimderdi jetkizý kólemin arttyrý baǵytynda jumys júrgizilip jatyr.
Mınıstr Qazaqstannyń negizgi eksporttyq baǵyttary TMD jáne Eýrazııalyq ekonomıkalyq odaq elderi, Qytaı jáne Eýropalyq odaq ekenin atap ótti. Bul naryqtarǵa Qazaqstan eksportynyń shamamen 80%-y tıesili.
– Biz qazir Jahandyq Ońtústikke qatysty baǵyttarǵa da úlken nazar aýdaryp otyrmyz. Marshrýttar ózgerip jatyr. Qazaqstan dástúrli jetkizý baǵyttaryn senimdi túrde arttyryp keledi. Ekinshi másele óńdelgen ónimderdiń túrleri men assortımentin barynsha keńeıtýimiz kerek. Bul jyl saıyn júzege asatyn protsess, – dedi mınıstr.
Arman Shaqqalıevtiń sózinshe, ınvestıtsııalyq ahýaldyń jaqsarýy, joǵary reıtıngter jáne jańa kásiporyndardyń kóbeıýi Qazaqstannyń eksporttyq áleýetin arttyrýǵa múmkindik beredi.
– Men sizderge aıtaıyn, Qazaqstan qurlyqtaǵy Sıngapýr bolady. Bul jaı ǵana sóz emes, bul – bizdiń jaqyn bolashaǵymyz, – dedi Arman Shaqqalıev.
Buǵan deıin Qazaqstan qaı elderge astyq eksportyn arttyratynyn jazǵanbyz.
