Qazaqstan qurylys materıaldarynyń 73%-yn ózi óndiredi
ASTANA. KAZINFORM — Qazaqstanda qurylys materıaldary naryǵynyń 73 paıyzyn otandyq kásiporyndar qamtamasyz etedi. 2026 jyldyń qańtar-shilde aılarynda bul naryqtyń kólemi 2,5 mıllıard dollarǵa jetken. Bul týraly «QazIndustry» Qazaqstandyq ındýstrııa jáne eksport ortalyǵy» AQ basqarma tóraǵasy Eldar Ǵumarov aıtty.
Astanada ótken «Jalpyhalyqtyq aýqymdy qurylys — 2027: Qazaqstan ekonomıkasy úshin jańa múmkindikter» atty sarapshylyq talqylaýda Eldar Ǵumarov eldegi qurylys ındýstrııasynyń qazirgi jaǵdaıy men otandyq óndiristi damytýdyń múmkindikterine toqtaldy.
Onyń aıtýynsha, sońǵy jyldary Qazaqstanda qurylys materıaldaryn shyǵaratyn edáýir óndiristik baza qalyptasqan. Qazir tsement, armatýra, metall konstrýktsııalary men temirbeton buıymdaryna degen qajettiliktiń basym bóligi el ishinde óteledi. Jıhaz óndirisi de damyǵan.
— Degenmen ónerkásiptik jáne ınfraqurylymdyq nysandar salý úshin qurylys materıaldary ǵana jetkiliksiz. Mundaı jobalarǵa ınjenerlik júıeler, tehnologııalyq jabdyqtar, elektr tehnıkasy, óndiristi avtomattandyrý quraldary men arnaıy hımııalyq ónimder qajet. Sondyqtan aldaǵy aýqymdy qurylys jumystary otandyq kásiporyndardyń kúrdeli tehnologııalyq ónimderdi ıgerýine múmkindik berýi tıis, — dedi basqarma tóraǵasy.
Eldar Ǵumarovtyń málimetinshe, 2025 jyldyń qorytyndysy boıynsha elimizde jalpy quny shamamen 2,3 trıllıon teńge bolatyn 190 ónerkásiptik joba júzege asyrylǵan. Osy jobalar aıasynda buryn Qazaqstanda óndirilmegen ónimderdiń 10-nan astam túrin shyǵarý qolǵa alynǵan.
— Aldaǵy ýaqytta jekelegen jabdyqtardy shyǵarýmen shektelmeı, tutas tehnologııalyq júıelerdi óndirýge kóshý qajet. Ol úshin memleket josparlanǵan ınfraqurylymdyq jobalarǵa qandaı jabdyqtar men materıaldar qajet bolatynyn birneshe jyl buryn anyqtaýy kerek. Bul shetelden satyp alynatyn ónimderdiń qaısysyn Qazaqstanda óndirýge bolatynyn baǵalaýǵa múmkindik beredi, — dedi spıker.
Sondaı-aq Eldar Ǵumarov otandyq kásiporyndardy uzaqmerzimdi tapsyryspen qamtamasyz etý úshin ofteık-kelisimsharttardy paıdalanýdyń mańyzyn aıtty. Onyń pikirinshe, jańa óndirister ishki naryqtyń qajettiligin ótep qana qoımaı, Ortalyq Azııa elderinde de básekege qabiletti bolýy tıis.
Aıta keteıik, 2029 jyldyń sońyna deıin áleýmettik, kólik, energetıka jáne kommýnaldyq ınfraqurylymdy jańǵyrtýǵa Ulttyq qordan shamamen 6,5 trıllıon teńge bólý kózdelgen. QazIndustry bul qarjy esebinen júzege asatyn jobalar otandyq ónerkásiptiń damýyna da serpin berýi kerek dep esepteıdi.
Eske salaıyq, buǵan deıin atalǵan jıynǵa qatysqan «Qazaqstan turǵyn úı kompanııasy» AQ basqarma tóraǵasy Altaı Kúzdibaev elde eski úılerdi jańartý baǵdarlamasy aıasynda turǵyndardyń múddesin qorǵaýǵa arnalǵan jańa kepildik tetigi iske qosylatynyn aıtqan edi.
