Qazaqstan – qurylys alańy: Prezıdent qatań baqylaý bolatynyn eskertti
ASTANA. KAZINFORM – Elimizdiń ár aımaǵynda áleýmettik mańyzy zor nysandar, mektepter, emhanalar jáne sport mekemeleri boı kóterip jatyr. Ondaǵan myń shaqyrym avtokólik joly men temirjol salynýda. Memleket basshysy Qasym-Jomart Toqaev qurylystyń sapasyn qatań baqylaýda ustaıtynyn eskertti.
Prezıdenttiń aıtýynsha, búginde Qazaqstan tarıhı taǵdyrsheshti dáýirge qadam basty. Qoǵamnyń barlyq salasynda aýqymdy reformalar jasaldy.
– Memleketimizdiń saıası júıesi túbegeıli jańǵyrýda. El ekonomıkasy da tyń qarqynmen ósip-órkendeýde. Qazaqstannyń ár aımaǵynda áleýmettik mańyzy zor nysandar, mektepter, emhanalar jáne sport mekemeleri boı kóterip jatyr. Ulan-ǵaıyr jerimizde ondaǵan myń shaqyrym avtokólik joly men temirjol salynýda. Bul jumys toqtamaıdy. Qazaqstan úlken qurylys alańy, basqa sózben aıtsaq, jasampazdyq mekeni bolýy kerek, – dedi Qasym-Jomart Toqaev Prezıdent saıabaǵynda ótken «Taza Qazaqstan» ekologııalyq naýqanynda.
Bul rette Memleket basshysy qurylystyń sapasy óte joǵary bolýy qajettigin eskertti.
– Men óz basym osy máselege basa nazar aýdaryp, bul jumysty qatań baqylaýda ustaımyn. Atalǵan nusqaý men tıisti erejeni buzatyn adamdar zańymyz boıynsha mindetti túrde jazaǵa tartylady, – dedi Q. Toqaev.
Aıta keteıik, Memleket basshysy Qasym-Jomart Toqaev «Taza Qazaqstan» ekologııalyq aktsııasyna qatysty jáne jas ekobelsendilermen birge Prezıdent saıabaǵy aýmaǵynda aǵash ekti.
Buǵan deıin Q. Toqaev elimizdiń árbir azamaty búgin de, erteń de taza Qazaqstanda jaıly ómir súrýi kerektigin aıtqan edi.
Jyl basynan beri «Taza Qazaqstan» aktsııasyna 7 mln adam qatysyp, 130 myń gektar jer tazartylǵan.
